ގިނަ ބައެއްގެ ލޯބި ހޯދާފައިވާ ބޮލީވުޑްގެ މަޝްހޫރު އެކްޓަރެއް ކަމަށްވާ އަކްޝޭ ކުމާރުގެ ލޮލަށް ފިލްމު ޝޫޓިންއެއްގެ ތެރެއިން އަނިޔާވެ ފަރުވާދީފި އެވެ.

ހަބަރުތައް ބުނާ ގޮތުގައި މިވަގުތު މުމްބާއީގައި "ހައުސްފުލް 5"ގެ ޝޫޓިންގައި ބައިވެރިވަމުން އަންނަ އަކްޝޭއަށް އަނިޔާވީ ސްޓަންޓެއް ޖައްސަން އުޅުމުގެ ތެރޭގަ އެވެ. ކަމާ ގުޅުންހުރި ފަރާތަކުން މީޑިއާއަށް މައުލޫމާތު ދިން ގޮތުގައި ސްޓަންޓްގެ ތެރެއިން އަކްޝޭގެ ލޮލަށް އެއްޗެއް އައިސް ވަނީ އެވެ. ވަގުތުން ލޮލުގެ ޑޮކްޓަރެއް ސެޓަށް ގެނެސް ލޮލުގައި ބެންޑޭޖް އަޅުވައި އަކްޝޭއަށް އަރާމުކުރަން ލަފާދިން ކަމަށް އެފަރާތުން ބުންޏެވެ.

އަކްޝޭއަށް ލިބުނު އަނިޔާއާއެކު ކުޑަ ދުވަސްކޮޅަކަށް ހައުސްފުލް 5ގެ ޝޫޓިން މެދުކެނޑޭނެ ކަމަށް ބެލެވުނު ނަމަވެސް އަކްޝޭ ހުރީ ވީހާ ވެސް އަވަހަކަށް ޝޫޓިންއާ ގުޅެން ތައްޔާރަށް ކަމަށް ހަބަރުތައް ބުނެ އެވެ.

ހައުސްފުލްއަކީ އެންސެމްބަލް ކާސްޓަކާއެކު މިއަންނަ އަހަރު ރިލީޒް ކުރަން ހަމަޖެހިފައިވާ ފިލްމެކެވެ. އަކްޝޭގެ އިތުރުން އެ ފިލްމުގެ ތަރިންގެ ތެރޭގައި ރިތޭޝް ދޭޝްމުކް، ސަންޖޭ ދަތު، ފަރުދީން ޚާން އަދި ޝްރެޔާސް ތަލްޕަޑޭ ހިމެނެ އެވެ.