ވެރިކަމުގެ ދަޢުރު ހަމަވުމާ ގާތްވަމުންދާ ވަރަކަށް އެމެރިކާގެ ރައީސް ޖޯ ބައިޑަން ތަފާތު ނިންމެވުންތަކެއް ނިންމަވަމުން އަންނަ ކަމަށް އެމެރިކާގެ މީޑިއާތަކުން ފާހަގަކުރަން ފަށައިފި އެވެ.

އެގޮތުން މިވަގުތު އެމެރިކާގެ ނޫސްތަކުގައި އެންމެ ވަރުގަދައަށް ދެކެވެމުން އަންނަ އެއްވާހަކައަކީ އެމެރިކާގެ ޖަލުތަކުގައި ތިބި ކުށްވެރިންގެ ތެރެއިން 39 ކުށްވެރިންނަށް މައާފު ދީ، 1،500 ކުށްވެރިންގެ އަދަބު ލުއިކޮށްދީފައިވާ ވާހަކަތަކެވެ. މިއީ މިހާރުގެ ރައީސް ބައިޑަންގެ ވެރިކަން ނިމެން ކައިރިވެފައި ވަނިކޮށް، ބައިޑަން ނިންމި ވަރަށް ބޮޑު ނިންމުމެއް ކަމަށް އެމެރިކާގެ ނޫސްތަކުން ބުނެ އެވެ.

މިކަމާ ގުޅިގެން ބައިޑަން ވިދާޅުވީ މައާފު ދެއްވާފައިވާ ކުށްވެރިންނަކީ އެހެން މީހުންގެ ނަފްސަށް ނުރައްކަލަކަށްވާފަދަ ކުށްތަކަށް އަރައިގެންފައިވާ މީހުން ނޫން ކަމަށާއި އަދި އަދަބު ލުއިކޮށްދެއްވި ކުށްވެރިންގެ ތެރޭގައި ހިމެނެނީ ދިގު ޖަލު ހުކުމްތައް ތަންފީޒު ކުރަމުންދިޔަ މީހުން ކަމަށެވެ.

ރައީސް ބައިޑަން ގިނަ އަދަދެއްގެ މީހުންނަށް މައާފުދެއްވައި އަދަބު ލުއިކޮށްދެއްވާފައި މިވަނީ މިދިޔަ ހަފުތާގެ ތެރޭގައި އޭނާގެ އަމިއްލަ ދަރިކަލުން, ހަންޓަ ބައިޑަންއަށް ޝަރުތަކާނުލައި މައާފުދެއްވާފައި ވަނިކޮށެވެ.

މީގެ ކުރިން މަސްތުވާތަކެތީގެ މައްސަލަތަކެއްގައި ވެސް ހިމެނިފައިވާ ހަންޓާގެ ޓެކުހާއި ހަތިޔާރާ ގުޅޭ ޝަރުއީ މައްސަލަަތަކެއްގެ ތެރެއަށް ވަދެވަޑައިނުގަންނަވާނެ ކަމަށް ކުރިން ވައުދުވެވަޑައިގެންނެވި ބައިޑަން އޭނާގެ ދަރިކަލުންނަށް މައާފުދެއްވުމުން ގިނަ ބައެއްގެ ފާޑުކިޔުން އޭނާއަށް އަމާޒުވި އެވެ. އަދި އަމިއްލަ ދަރިކަލުންނަށް މަޢާފު ދެއްވި ބީދައިން ހައްގަކާނުލައި އަދަބު ލިބެމުންދާ މީހުންނަށް ވެސް މައާފުދެއްވުމަށް ގިނަ އަދަދެއްގެ މީހުން ދިޔައީ ގޮވައިލަމުންނެވެ.

ރައީސް ބައިޑަން އަދަބު ލުއިކޮށްދެއްވާފައި ވަނީ ކޮވިޑް-19ގެ އާލަމީ ބަލިމަޑުކަމުގެ ދުވަސްވަރު ގޭ ބަންދަށް ބަދަލުކޮށްފައިވާ މީހުންނަށެވެ. އަދަބު ލުއިކޮށްދެއްވަން ނިންމެވި ސަބަބު ސާފުކޮށްދެއްވަމުން ބައިޑަން ވިދާޅުވީ މިހާރުގެ ހާލަތުގައި އެމީހުންގެ މައްސަލަ ބަލައި ހުކުމްކުރާ ނަމަ އެމީހުންގެ ހުކުމް އެހާ ހަރުކަށި ނުވާނެ ކަމަށެވެ.

ބައިޑަން ވިދާޅުވީ އެމެރިކާގެ ރައީސްގެ ހައިސިއްޔަތުން، ކުރެވިފައިވާ ކުށާމެދު ހިތާމަކުރާ މީހުންނަށާއި އުޅުން ބަދަލުކޮށްފައިވާ މީހުންނަށް މައާފު ދެއްވުމަކީ އެމަނިކުފާނަށް ލިބިވަޑައިގެންފައިވާ ޝަރަފެއް ކަމަށެވެ.