ރައްޔިތުންގެ މަޖިލީހުގެ މެމްބަރުން ބޭނުންވާ ބަޔަކަށް ވަޒީފާ ދިނުމަށްޓަކައި އެކި ދާއިރާތަކަށް މުވައްޒަފުން ހޯދަން ސްޓެލްކޯއިން އިއުލާންކޮށްފި އެވެ.

"ހުރިހާ"އަށް އެނގިފައިވާ ގޮތުގައި ވަޒީފާއަށް ނަގަން ބޭނުންވާ މީހުންގެ ރައްޔިތުންގެ މަޖިލީހުގެ މެމްބަރުން މިހާރު ވަނީ ދީފަ އެވެ. ސްޓެލްކޯއިން އިއުލާން ކުރީ އެ މީހުންނަށް ވަޒީފާއަށް ކުރިމަތިލުމުގެ ފުރުސަތު ފަހިކޮށްދިނުމަށެވެ. އެއީ އާންމުކޮށް ވަޒީފާއަށް މީހުން ހޯދަން ކުރާ އިއުލާންތަކާ ތަފާތުގޮތަކަށް ކޮށްފައިވާ އިއުލާނެކެވެ.

އެ އިއުލާންގައި ވަނީ 12 ދާއިރާއެއްގެ ވަޒީފާއަށް ކުރިމަތިލާން ފުރުސަތު ހުޅުވާލާފަ އެވެ.

އެ މަގާމްތަކަށް ޝަރުތުހަމަވާ މީހަކު ކުރިމަތިލާފައި ނުވިޔަސް ހުށަހަޅާފައިވާ ލިޔެކިއުންތަކާއި، ތަޖުރިބާ އަދި އިންޓަވިއުއަށް ބެލުމަށްފަހު، އެންމެ އެކަށީގެންވާ ފަރާތްތަކަށް ވަޒީފާ ހަމަޖެއްސުމުގެ އިޚްތިޔާރު ސްޓެލްކޯއަށް ލިބިގެންވާ ކަމަށް ވެސް އެ އިއުލާނުގައިވެ އެވެ.

ވަޒީފާ ހަމަޖެހިފައިވާ ބައެއް މީހުން ވަނީ "ހުރިހާ"އަށް އެކަން ކަށަވަރުކޮށްދީފަ އެވެ. އެ މީހުން ބުނީ ވަޒީފާ ހަމަޖެހުނުކަން އެ ދާއިރާގެ މަޖިލިސް މެމްބަރު މިހާރު އަންގާފައިވާ ކަމަށެވެ.

"އަޅުގަނޑަށް ވަޒީފާ ހަމަޖެހުނުކަން އެމްޕީ ވަނީ އަންގާފައި. އެމްޕީ ދެންނެވީ އިއުލާނުގައިވާގޮތަށް ވަޒީފާއަށް ކުރިމަތިލާން. އެއިރުން ހުރިހާ ކަމެއް ވެސް ހަމަޖެހޭނެ ކަމަށް،" ވަޒީފާ ދޭން ނިންމާފައިވާ މީހަކު "ހުރިހާ"އަށް ކިޔައިދިނެވެ.

ސްޓެލްކޯއިން ގިނަ އަދަދެއްގެ ވަޒީފާ ދޭން ނިންމާފައި މިވަނީ ސަރުކާރުގެ ހަރަދުކުޑަކުރުމުގެ ގޮތުން ގިނަ އަދަދެއްގެ މުވައްޒަފުން ވަޒީފާއިން ވަކިކޮށްފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެފައި ވަނިކޮށެވެ. ނަމަވެސް ވަޒީފާއިން ވަކިކުރީ ކޮން ބައެއް ކަމެއް ސަރުކާރަކަށް ބުނެ ނުދެވެ އެވެ.