ކާތިކް އާރްޔަންގެ ފިލްމު "ޗަންދޫ ޗެމްޕިއަން"ގެ އޮޑިޝަންގައި ދޮޅު މިނެޓަށް ބުނި ދޮގުތަކެއްގެ ސަބަބުން ދޮޅު އަހަރު ގަދައަޅާ މަސައްކަތް ކުރަން ޖެހުނު ކަމަށް އޭނާ ބުނެފި އެވެ.

އިންޑިއާގެ ފުރަތަމަ ޕެރަލިމްޕިކް ގޯލްޑް މެޑަލިސްޓް ފެތުންތެރިޔާ މުރްލީކާންތު ޕެޓްކަރުގެ ހަޔާތުގެ މައްޗަށް އުފެއްދި އެ ފިލްމުގައި ކާތިކް ދައްކުވައިދިނީ މުރްލީކާންތުގެ ރޯލެވެ.

ދާދިފަހުން ބޭއްވި އިވެންޓެއްގެ ތެރެގައި ކާތިކް ވަނީ އެ ފިލްމަށް އޭނާ ވާން ޖެހުނު ތައްޔާރީތަކާ ބެހޭ ގޮތުން ވަރަށް ތަފްސީލުކޮށް ވާހަކަ ދައްކާފަ އެވެ.

ކާތިކް ބުނީ އޮޑިޝަނުގައި ފަތަން އެނގޭތޯ ސުވާލު ކުރެވުމުން ދޮގުހެދި ކަމަށާއި ހަގީގަތުގައި އޭނާއަށް އެހާ ރަނގަޅަށް ފަތަން ނޭނގޭ ކަމަށެވެ.

ނަތީޖާއަކަށްވީ އޮޑިޝަނަށްފަހު ފިލްމުގެ ލީޑު ރޯލު ލިބުމުން ފަތަން ދަސްކުރަން ދޮޅު އަހަރު ވަންދެން މަސައްކަތް ކުރަން ޖެހުން ކަމަށް އޭނާ ބުންޏެވެ.

ކާތިކް އިތުރަށް ބުނީ އެ ފިލްމަށް ވީ ތައްޔާރީތަކުގެ ތެރެއިން އޭނާގެ އަމިއްލަ ހަށިގަނޑަށް ވެސް ބޮޑު ކުރިއެރުންތަކެއް ލިބުނު ކަމަށާއި އެއީ އޭނާއަށް ލިބުނު ކާމިޔާބީއެއްގެ ގޮތުގައި ދެކޭ ކަމަށެވެ.

ކަބީރު ޚާން ޑައިރެކްޓްކުރި "ޗަންދޫ ޗެމްޕިއަން" އަށް ގިނަ ބައެއްގެ ސަމާލުކަން ލިބުނު ނަމަވެސް ބޮކްސްއޮފީހުގައި އެ ފިލްމު ވަނީ ނާކާމިޔާބުވެފަ އެވެ.