މިދިޔަ ބުރާސްފަތި ދުވަހު ތިން މިނިސްޓްރީއެއް ބޭނުން ނުކުރެވޭވަރަށް އަނދައިގެން ދިޔަ އަލިފާނުގެ ހާދިސާއާ ގުޅޭ ތަހުގީގެއް ހިންގުމަށް ފުލުހުންނާއި އިންޓެގްރިޓީ ކޮމިޝަނުގައި އެދުމަށް އެމްޑީޕީން ނިންމައިފި އެވެ.

އެމްޑީޕީ އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ލީގަލް ޑައިރެކްޓަރު މަހްފޫޒް ސައީދު ވިދާޅުވީ އަލިފާނުގެ ހާދިސާގައި މިނިވަން ތަހުގީގެއް ހިންގުމަކީ މުހިންމު ކަމެއް ކަމަށެވެ.އެ ގޮތުން ޖިނާއީ މައްސަލައެއްގެ ގޮތުގައި އެ މައްސަލަ ތަހުގީގު ކުރުމަށް އެދޭނެ ކަމަށް މަހުފޫޒު ވިދާޅުވި އެވެ.

އަލިފާނުގެ ހާދިސާގައި އިހުމާލުގެ އަމަލުތައް ފާހަގަ ކުރެވޭތީ އެކަން ބަލައި ދިނުމަށް އިންޓަގްރިޓީ ކޮމިޝަންގައި އެދޭނެ ކަމަށް ވެސް މަހްފޫޒް ވިދާޅުވި އެވެ. މި ތަހުގީގުގައި ސިފައިން ބައިވެރިކުރުމަކީވެސް އެދޭ ކަމެއް ކަމަށް އޭނާ ވިދާޅުވި އެވެ.

މަހްފޫޒް ވިދާޅުވީ އަލިފާނުގެ ހާދިސާގައި މިނިސްޓްރީތަކުން ގެއްލުނު ލިޔުންތަކަކީ އަރުޝީފުގެ ގާނޫނުގެ ދަށުން އަރުޝީފު ކުރެވިފައި ހުރި ތަކެތިތޯ ބެލުމަށް އަރުޝީފުގެ ޑިރެކްޓަރުގެ އަރިހުން ވެސް އެދޭނެ ކަމަށެވެ.

އެމްޑީޕީގެ ލީގަލް ޑައިރެކްޓަރު މަހްފޫޒް ސައީދު --- ފޮޓޯ: އެމްޑީޕީ

މައްސަލަ ތަހުގީގު ކުރުމަށް ބޭރުގެ ތަޖުރިބާކާރުންގެ އެހީ ހޯއްދެވުމަށް ސަރުކާރުން ނިންމިއިރު، ހާދިސާ ހިނގި ސީން ރޫޅާލައި އެތަން ސާފު ކުރުމުން ސުވާލު އުފެދޭ ކަމަށްވެސް މަހްފޫޒް ވިދާޅުވި އެވެ.

އެގޮތުން އަލިފާނުގެ ހާދިސާއަކީ ބަޔަކު ގަސްތުގައި ކުރި ކަމަކަށްވާނަމަ، އެތަން ސާފު ކުރުމަކީ ހެކި ނައްތާލުމުގެ އަމަލެއް ކަމަށާއި އެކަމާ ގުޅިގެން ކަންބޮޑުވާ ކަމެއް ކަމަށް އޭނާ ވިދާޅުވި އެވެ.

އަލިފާނުގެ ހާދިސާގައި އެނދި ތިން މިނިސްޓްރީއަކީ ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީ އެވެ. އޭގެ ތެރެއިން ހައުސިން މިނިސްޓްރީ ހުރި އިމާރާތުގައި ސިޓީ ކައުންސިލުގެ ބައެއްވެސް ހުއްޓެވެ. އަދި އެންވަޔަރަމަންޓް ޕްރޮޓެކްޝަން އެޖެންސީ (އީޕީއޭ) ހިންގަމުން އައީ އެންވަޔަރަމަންޓް މިނިސްޓްރީގަ އެވެ.

މީގެ ތެރެއިން ހަތަރު އިދާރާގެ މަސައްކަތް އިއްޔެއިން ފެށިގެން ދަރުބާރުގޭގައި އަލުން ވަނީ ފަށާފަ އެވެ.