އެމްއެމްޓީވީ ހިންގަން ފައިސާ ހޯދަން އެންސްޕާއާއެކު ހެދި ޑީލް ނިމުމަކަށް ގެންނަން މަޖުބޫރުވުމުން ފައިސާ ލިބުން ދަތިވެ، ސަރުކާރުގެ ސިޔާސީ މަގާމްތަކުގައި ތިބި މީހުން އެމްއެމްޓީވީގެ މަސައްކަތްތަކަށް ނެރެން ފަށައިފި އެވެ.

އެމްއެމްޓީވީވެ އޮފިޝަލަކު ވަނީ މިކަން "ހުރިހާ"އަށް ކަށަވަރުކޮށްދެއްވާފަ އެވެ.

އެމްއެމްޓީވީ ހިންގުމުގައި އެންމެ އިސްކޮށް އުޅުއްވަނީ ރައީސް އޮފީހުގެ ކޮމިޔުނިކޭޝަން މިނިސްޓަރު އިބްރާހީމް ޚަލީލާއި ޑެޕިއުޓީ އަންޑާސެކްރެޓަރީ މުހައްމަދު އިކްރާމްއަބްދުއްލަތީފެވެ. އެ ދެ ބޭފުޅުންގެ ދަށުން ޓީވީ ހިންގުމުގައި އަމަލީގޮތުން އުޅެނީ ރައީސް އޮފީހުގެ ސިޔާސީ މަގާމެއްގައި ހުރި ބަހާއުﷲ އިބްރާހީމެވެ.

ސަރުކާރުގެ އެކި މިނިސްޓްރީތަކުގައި މަސައްކަތް ކުރާ ސިޔާސީ މުވައްޒަފުންނަށް ވަނީ އެ ޓީވީ ޗެނަލްގައި މަސައްކަތް ކުރަން އަންގާފަ އެވެ. އެގޮތުން ހެރިޓޭޖް މިނިސްޓްރީގައި މަސައްކަތްކުރާ ބައެއް ސިޔާސީ މުވައްޒަފުންނަށް އެމްއެމްޓީވީގައި މަސައްކަތްކުރުމަށް އަންގާފައިވާތީ ސޯޝަލް މީޑިއާގައި ބައެއް ފަރާތްތަކުން އަންނަނީ އެކަމަށް ފާޑުކިޔަމުންނެވެ.

ހެރިޓޭޖް މިނިސްޓްރީގައި ސިޔާސީ މަގާމެއްގައި ހުރި މުހައްމަދު އަހްސަން ގެންދަވަނީ އެމްއެމްޓީވީގެ ބައެއް ޕްރޮގްރާމްތައް ފްރެޒެންޓްކުރަމުންނެވެ.

އެމްއެމްޓީވީ ހިންގަނީ މޯލްޑިވްސް މީޑިއާ ހައުސް ނަކަމަށް ކިޔާ ކުންފުންޏެއްގެ ދަށުންނެވެ. އެ ކުންފުނި ރަޖިސްޓްރީކުރިއިރު ހިއްސާދާރުންގެ ގޮތުގައި އަދި ޑިރެކްޓަރުންގެ ބޯޑުގައި ތިބީ ތިން މީހެކެވެ. އެއީ ރައީސްގެ އަމިއްލަގެ މ. ދިމްޔާތު ބެލެހެއްޓުމުގައި މިހާރު އިސްކޮށް ހުންނެވި، ހއ. ވަށަފަރު، ހުސްނުހީނާގޭ، އަބްދުﷲ ޒާހިރު އާއި ރައީސް އޮފީހުގެ މިނިސްޓަރު ޚަލީލުގެ ދޮންދަރި، ގ. ދަނބުކޮކާ، އަހުމަދު ސައިފް ހަލީމް އާއި އައިޝަތު ޝީރީނާ ކިޔާ މީހެކެވެ. މީޑިއާ ހައުސް، ރަޖިސްޓްރީކޮށްފައި ވަނީ ހަލީލު ދިރިއުޅުއްވާ، ގ. ދަނބުކޮކާގަ އެވެ.

ކުންފުނި ރަޖިސްޓްރީ ކުރިއިރު ސައިފް އާއި ޝީރީނާ ހިއްސާދާރުންގެ ގޮތުގައި ތިއްބަސް، އެމްއެމްޓީވީން ބްރޯޑްކާސްޓްކުރަން ފެށީ އެ ދެ މީހުންގެ ނަން ކުންފުނިން އުނިކޮށް، ހަމައެކަނި އަބްދުﷲ ޒާހިރު އަށް މުޅި ކުންފުނި ބަދަލުކޮށްފަ އެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ ޕީއެސްއެމްގެ ނަމުގައި ދޫކުރި ލޯނެއްގެ ތެރެއިން އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ކުރިން ވިދާޅުވި އެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް އޭނާ ވިދާޅުވި އެވެ.

"މިތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައި. އެކަމަކު ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް،" އެ އޮފިޝަލް ވިދާޅުވި އެވެ.

އެމްއެމްޓީވީއަށް މުވައްޒަފަކު ނެގެނީ އިކްރާމް އެޕްރޫވް ކުރުމުންނެވެ. އަދި މުވައްޒަފަކު ވަޒީފާއިން ވަކިކުރުމުގެ ބާރު ވެސް ދީފައި ވަނީ އިކްރާމަށެވެ. އެ ޓީވީ ޗެނަލް ހިންގުމުގެ ކަންކަން ދުވަހުން ދުވަހަށް ބަލައި ހަލީލް ގެންދަވަނީ އެކި އިރުޝާދުތައް ދެމުންނެވެ.