ކުރިއަށް އޮތް އެކަޑަމީ އޮސްކާ އެވޯޑްސްގައި އެރިއާނާ ގްރާންޑޭއާއި ސިންތިއާ އެރިވޯގެ ކޮލެބޮރޭޝަން ހުށައެޅުމެއް ފެނުމުގެ ފުރުސަތު އެބައޮތް ކަމުގެ އިޝާރާތެއް އޭނާ ދީފި އެވެ.

ދަ ހޮލީވުޑް ރިޕޯޓާއަށް ދިން އިންޓަވިއުއެއްގައި އެރިއާނާ ބުނީ ފިލްމު "ވިކެޑް"ގެ ކޯސްޓާރު ސިންތިއާއާއެކު މަސައްކަތް ކުރުމަކީ އޭނާ ވަރަށް ލޯބިކުރާ ކަމެއް ކަމަށާއި އެހެން ކަމުން ފުރުސަތު ލިބިއްޖެނަމަ އެކަމަށް ނޫނެކޭ ނުބުނާނެ ކަމަށެވެ.

އޮސްކާގައި އާއްމުކޮށް ހުށައަޅަނީ "ބެސްޓް އޮރިޖިނަލް ސޯންގް" ކެޓަގަރީއަށް ނޮމިނޭޓް ވެފައިވާ ގަދަ ފަސް ލަވަ އެވެ. މިފަހަރުގެ ނޮމިނޭޝަންތަކުގައި އެރިއާނާއާއި ސިންތިއާގެ ފިލްމު "ވިކެޑް"ގެ ލަވައެއް ހިމެނިފައެއް ނުވެ އެވެ.

އަންނަ މާޗު މަހު ބާއްވަން ހަމަޖެހިފައިވާ އޮސްކާގައި އެރިއާނާގެ ހުށައެޅުމެއް ފެނިދާނެ ކަމުގެ އިޝާރާތެއް ލިބިފައިވާއިރު އޭނާ ވަނީ ފިލްމު "ވިކެޑް"އިން އެ އެވޯޑުގެ "ބެސްޓް ސަޕޯޓިން އެކްޓަރު"ގެ ކެޓަގަރީއަށް ނޮމިނޭޓް ވެސް ވެފަ އެވެ.

މިއީ އޮސްކާ އެވޯޑަކަށް އެރިއާނާ ނޮމިނޭޓްވި ފުރަތަމަ ފަހަރަށްވާއިރު އޭނާ ވަނީ މިފަހުން ބޭއްވި ފަސްޓް ޓައިމް ނޮމިނޭޝަން ސެލެބްރޭޝަންގައި ވެސް ބައިވެރިވެފަ އެވެ.

އޮސްކާގެ އިތުރުން ވެސް "ވިކެޑް"ގައި އެރިއާނާ ދައްކުވައިދިން އެކްޓިންއަށް އޭނާއަށް ވަނީ ދާދި ފަހުން ގޯލްޑަން ގްލޯބް އެވޯޑްސްގެ ނޮމިނޭޝަންއެއް ވެސް ލިބިފަ އެވެ.