ސަރުކާރާއި އަމިއްލަ ފަރާތްތަކާ ދެމެދު ވެފައިވާ އެއްބަސްވުންތަކާ ގުޅިގެން އުފެދިފައިވާ މައްސަލަތައް ހައްލުކުރުމުގައި އަމަލުކުރާނެ ގޮތުގެ އުސޫލުގެ ދަށުން ސޮއިކޮށްފައިވާ ބަދަލު ދިނުމުގެ ނުވަ އެއްބަސްވުމެއް ބާތިލުކޮށްފި އެވެ.

އެޓާނީ ޖެނެރަލްގެ އޮފީހުން ބުނީ، މި އެއްބަސްވުންތަކަށް އަމަލުކުރަން ނުޖެހޭ ކަމަށް އޭޖީ ނިންމަވައި، ކަމާބެހޭ ދައުލަތުގެ އިދާރާތަކަށް މިއަދު އެކަން އަންގަވާފައިވާ ކަމަށެވެ.

މިދިޔަ ސަރުކާރުން އެކި ކުންފުނިތަކަށް ގެއްލުމުގެ ބަދަލުގެ ގޮތުގައި 1.6 ބިލިއަނަށް ވުރެ ގިނަ ރުފިޔާ ދޫކޮށްފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ދައްކަ އެވެ.

އުސޫލުގެ ދަށުން ސޮއިކޮށްފައިވާ ބަދަލުދިނުމުގެ އެއްބަސްވުންތަކާ ގުޅޭ މައްސަލަ ރައްޔިތުންގެ މަޖިލީހުގެ މާލިއްޔަތު ކޮމިޓީން ދިރާސާ ކުރުމަށްފަހު، އެ އެއްބަސްވުންތަކަކީ އުފެދުމުގައި ވެސް ބާތިލް އެއްބަސްވުންތަކެއް ކަމަށް ވަނީ ނިންމައިފަ އެވެ.

އެ އެއްބަސްވުންތައް ބާތިލް ކުރުމަށާއި، އެ އުސޫލާއި އެއްބަސްވުންތަކުގެ ދަށުން އެއްވެސް ބަދަލެއް ދީފައިވާނަމަ، އެ ބަދަލެއް އަނބުރާ ހޯދުމަށް ވެސް ވަނީ ނިންމާފަ އެވެ.

"ނިމިދިޔަ ރިޔާސީ ދައުރުގެ ތެރޭގައި ސޮއިކޮށްފައިވާ 9 ސެޓްލްމަންޓް އެއްބަސްވުމަކީ، ގާނޫނީ ގޮތުން ބަނދެވޭ އެއްބަސްވުންތަކެއް ނޫންކަމާއި، އެއީ ބާތިލް އެއްބަސްވުންތަކެއް ކަމާއި، އެ އެއްބަސްވުންތަކަކީ އަމަލުކުރަން ނުޖެހޭ އެއްބަސްވުންތަކެއް ކަން ކަމާބެހޭ ދައުލަތުގެ އިދާރާތަކަށް ބަންޑާރަ ނައިބު ވަނީ މިއަދު އަންގަވާފައެވެ." އޭޖީ އޮފީހުން ނެރުނު ބަޔާނުގައި ބުންޏެވެ.

ކުރީ ސަރުކާރުން ބަދަލުގެ ގޮތުގައި ވަނީ ފައިސާއާއި އެކި ރަށްތަކާއި ފަޅެއް ބަދަލުގެ ގޮތުގައި ދީފައިވެ އެވެ. އެގޮތުން ބަދަލުގެ ގޮތުގައި ދިން ފައިސާގެ އަދަދުގެ ޖުމްލަ 95.1 މިލިއަން ރުފިޔާ އަށް އަރަ އެވެ.

އޭޖީ އޮފީހުން މިއަދު ބުނީ އެ މައްސަލަތައް އެ އޮފީހުން ދިރާސާކުރިއިރު، ކުރީގެ އުސޫލަކީ ރާއްޖޭގެ ޖުމްހޫރިއްޔާގެ ގާނޫނުއަސާސީއާއި، ގާނޫނާ ހިލާފަށް އެކުލަވާލާފައިވާ އުސޫލެއްކަމާއި، އެ އުސޫލުގެ ދަށުން ނިންމާފައިވާ ނިންމުންތަކާއި ސޮއިކޮށްފައިވާ ސެޓްލްމަންޓް އެއްބަސްވުންތަކަކީ، އޭޖީގެ ބަހެއް ނެތި، ތައައްސުފީ ގޮތެއްގައި، ވަކި ފަރާތްތަކަކަށް ނުހައްގު މުއްސަނދިކަމެއް ލިބޭގޮތަށް ނިންމާފައިވާ ނިންމުންތަކެއްކަން ފާހަގަކުރެވިފައިވާ ކަމަށެވެ.

އެހެންކަމުން، އެ އުސޫލުގެ ދަށުން، ނިމިދިޔަ އެމްޑީޕީ ސަރުކާރުގައި ސޮއިކޮށްފައިވާ ނުވަ ސެޓްލްމަންޓް އެއްބަސްވުމަކީ، ބާތިލު އެއްބަސްވުންތަކެއް ކަމަށް އޭޖީ އޮފީހުން ވަނީ ނިންމާފައެވެ. އަދި އެއްބަސްވުންތަކަކީ ޢަމަލުކުރަންޖެހޭ އެއްބަސްވުންތަކެއް ނޫންކަން ކަމާބެހޭ ދައުލަތުގެ އިދާރާތަކަށް އެ އޮފީހުން އަންގާފައި ވާކަން ވެސް އޭޖީ އޮފީހުން ވަނީ ފާހަގަކޮށްފަ އެވެ.

މި މައްސަލައިގައި ވަނީ ދައުލަތުގެ އިސް މަގާމެއްގައި ހުރެ، ދައުލަތުގެ މުދަލާއި ފައިސާއަށް ޚިޔާނާތްތެރިވެ، އޭގެ ހައްގުވެރިން ފިޔަވައި އެހެން މީހުންނަށް އޭގެ ނަފާ ހޯދައިދިން ކަމަށް ތުހުމަތުކޮށްފައެވެ. އަދި ދައުލަތަށް ލިބެން އޮތް ފައިދާއަކަށް އުނިކަން ލިބޭ ފަދަ ގޮތަކަށް އަމަލުކޮށްފަ އޮތުމުން ކަމަށް ތުހުމަތުކުރެވޭތީ, ކުރީގެ ރައީސް އިބްރާހީމް މުހައްމަދު ޞާލިހުގެ އިތުރުން، ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްޗަށް ތަހުގީގެއް ހިންގުމަށް މަޖިލީހުން އޮތީ މީގެ ކުރިން ނިންމައިފަ އެވެ.