ވެރިކަމުގައި ހުންނަވަނިކޮށް ސަރުކާރު ތެރެއިން ހިނގާ ކަމަށް ތުހުމަތުކުރާ ކޮރަޕްޝަނާއި ވައްކަމުގެ މައްސަލަތައް ބަލައި ވަގުތުން ވަގުތަށް ފިޔަވަޅުއަޅަން ކެރިވަޑައިގެންނެވި ހަމައެކަނި ވެރިޔަކީ ރައީސް ޑރ. މުހައްމަދު މުއިއްޒު ކަމަށް ފިޝަރީޒް މިނިސްޓަރު އަހުމަދު ޝިޔާމް ރައީސް މުއިއްޒަށް ވަރަށް ބޮޑަށް ހުޝާމަދުކޮށްފި އެވެ.

ރައީސް މުއިއްޒަށް ހުޝާމަދުކޮށް ޝިޔާމް ރޭ އެހެން ވިދާޅުވީ މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން ގޯތިތަކެއް ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ފަށާފައިވަނިކޮށް އެކްސްގައި ކުރެއްވި ޕޯސްޓެއްގަ އެވެ.

އެކްސްގައި ކުރެއްވި ޕޯސްޓެއްގައި ޝިޔާމް ވިދާޅުވީ ވެރިކަމުގައި ހުންނަވަނިކޮށް ސަރުކާރު ތެރެއިން ހިނގާ ކަމަށް ތުހުމަތުކުރާ ކޮރަޕްޝަނާއި ވައްކަމުގެ މައްސަލަތައް ބަލައި ވަގުތުން ވަގުތަށް ފިޔަވަޅު އެޅުއްވުމަކީ މީގެކުރިން އެއްވެސް ރައީސަކު ވެރިކަމުގައި ހުންނަވައިގެން ކުރައްވަން ކެރިވަޑައިގެންނެވި ކަންކަން ނޫން ކަމަށެވެ.

ވެރިކަމުގެ ފުރަތަމަ ދުވަހުން ފެށިގެން ވެސް ރައީސް ގެންދަވަނީ ކޮރަޕްޝަނާއި ވައްކަމާ ދެކޮޅަށް ތަފާތު ދައްކަވަމުން ކަމަށާއި ދައްކަވާ ވާހަކަފުޅާއި އަމަލުފުޅު ދިމާކުރައްވާނެކަން ފާހަގަކުރެއްވި އެވެ.

"ދިވެހި ރައްޔިތުންގެ މުދަލާއި ފައިސާއަށް ހިޔާނަތްތެރިވާކަށް އެއްވެސް ފަރާތަކަށް އެމަނިކުފާނު ކުޑަ ވެސް ޖާގައެއް ނުދެެއްވާނެކަން މިއަދު ވެސް ސާބިތުކޮށްދެއްވައިފި،" ޝިޔާމް ވިދާޅުވި އެވެ.

ރައީސް ވަނީ އެމަނިކުފާނުގެ ސަރުކާރު ކޮރަޕްޓްނުވެ، ހިންގާނެކަމުގެ ޔަގީންކަން ދެއްވާ ކަމަށް ވިދާޅުވެފަ އެވެ. ސަރުކާރުގައި ހިމެނޭ އެއްވެސް ފަރާތަކުން އެފަދަ ކަމެއް ހިންގާކަން ސާބިތުވެއްޖެ ހާލަތެއްގައި އެ ފަރާތަކާ މެދު އަޅަން ޖެހޭ ގާނޫނީ ފިޔަވަޅު ފަސްޖެހުމެއް ނެތި އަޅުއްވާނެ ކަމަށެވެ.

ސޯޝަލް މީޑިއާގައި ދައުރުވާ ލިސްޓުން ދައްކާ ގޮތުން ޝަރުތު ހަމަނުވިޔަސް ގޯތި ދޫކުރި މީހުންގެ ތެރޭގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި މާލެ ވޯޓަ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހިމެނެ އެވެ.

އެމްޑަބްލިއުއެސްސީން ބުނެފައި ވަނީ އެ މައްސަލަ އާ ގުޅިގެން ފަޒީލް އިއްޔެއިން ފެށިގެން ހުރިހާ ޒިންމާތަކަކުން ވަކިކޮށް، އޮފީހަށް ނުނިކުމޭ ގޮތަށް ސަސްޕެންޑްކޮށްފައިވާ ކަމަށެވެ.

ފާހަގަކޮށްލެވޭ ގޮތުގައި އެޗްޑީސީ ތެރެއިން އެމްޑީ ފަޒުލް އިސްވެ ހުންނަވާ ކޮރަޕްޝަންއަށްމަގުފަހިވާ ގޮތަށް އެތައް ކަންތައްތަކެއް ކުރައްވަމުން ގެންދެވިއިރު، މީގެ ފަސް މަސް ކުރިންވެސް ވަނީ މިކަން ރައީސް މުއިއްޒުގެ ސަމާލުކަމަށް ގެނެސްފަ އެވެ. ނަމަވެސް ރައީސްގެ އަރިސް ބޭފުޅެއްކަމަށްވާ ފަޒުލްއަށް އެއްވެސް ފިޔަވަޅެއް އަޅާފައި ނުވެ އެވެ.