ބޮލީވުޑްއަކީ މަޝްހޫރު ވަކި ބަޔަކު ހަދައިގެން އުޅޭ "ހިޔާލީ" ތަނެއް ކަމަށް އިންޑިއާގެ ކާމިޔާބު އެކްޓަރެއް ކަމަށްވާ ރިޗާ ޗައްދާ ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި ރިޗާ ބުނީ ބޮލީވުޑްއަކީ މުމްބާއީގެ ނުފޫޒުގަދަ ބައެއް އާއިލާތަކުން ހަދައިގެން އުޅޭ އެއްޗެއް ކަމަށެވެ.

އެހެން ނަމަވެސް ހަގީގަތުގައި ބޮލީވުޑްއޭ ކިޔެނީ ހިންދީ ފިލްމީ ދާއިރާއަށް ކަމަށާއި އެ ދާއިރާއަކީ އަބަދުވެސް ބަދަލުވަމުން އަންނަ ދާއިރާއެއް ކަމަށް ވެސް ރިޗާ ބުންޏެވެ.

ރިޗާ މިހެން ބުނެފައި މިވަނީ އޭނާއާއި އޭނާގެ ފިރިމީހާ އަލީ ފަޒާލްގެ އަމިއްލަ ކުންފުނިން އުފެއްދި "ގާލްސް ވިލް ބީ ގާލްސް"އާ ބެހޭގޮތުން ވާހަކަ ދައްކަމުންނެވެ.

ރިޗާ ބުނީ އެ ފިލްމަކީ ބޮލީވުޑްގައި އާއްމުކޮށް އަލިއަޅުވާލާނެ ފަދަ މައުލޫއަކަށް ހަދާފައިވާ ފިލްމެއް ނޫން ކަމަށާއި އެހެން ނަމަވެސް އާއްމުންގެ ހިޔާލު ބަދަލުވަމުން އަންނައިރު އެ ފިލްމަށް ވެސް ކާމިޔާބު ލިބިދާނެ ކަމަށެވެ.

އެ ފިލްމާ ބެހޭގޮތުން އަލީ ފަޒާލް ބުނީ ފިލްމަށް ފައިސާ ހޯދަން އުނދަގޫވި ކަމަށާއި މަޝްހޫރު އެކްޓަރުން ލައިގެން ކުޅޭ ފިލްމުތަކާ ހިލާފަށް އެ ފިލްމަށް ލިބޭނެ އާމްދަނީ ނޭނގޭތީ އިންވެސްޓަރުން ފައިސާ ހަރަދު ކުރަން ފަސްޖެހޭ ކަމަށެވެ.

"ގާލްސް ވިލް ބީ ގާލްސް" ވަނީ މިދިޔަ ހަފްތާގެ ތެރޭގައި އޮންލައިން ޕްލެޓްފޯމެއް ކަމަށްވާ އެމޭޒަން ޕްރައިމް ވީޑިއޯގައި ރިލީޒްކޮށްފަ އެވެ.