މާލޭ ސިޓީ ކައުންސިލަށް ފުރަތަމަ ފަހަރަށް އިންޓާނަލް އޮޑިޓަރެއް އައްޔަންކޮށްފި އެވެ.

ކައުންސިލަށް އިންޓާނަލް އޮޑިޓަރެއް އައްޔަންކުރުމަށް އޮޑިޓަރަކު ހޯދުމަށް އިއުލާން ކޮށްފައިވަނީ މިދިޔަ އޮކްޓޫބަރު މަހު އެވެ.

މިކަމާއި ގުޅިގެން މާލޭ ސިޓީގެ މޭޔަރު އާދަމް އާޒިމް ރޭ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، މާލޭ ސިޓީ ކައުންސިލަކީ ރައްޔިތުންގެ ޓެކްސް ފައިސާއިން ހިންގާ ތަނަކަށް ވާއިރު، އެ ފައިސާ އާއި މުދާ ބޭނުން ކުރަނީ ރަގަޅަށްތޯ ކަށަވަރު ކުރަން ޖެހޭ ކަމަށެވެ. އަދި އެކަން ކުރަން ނިންމީ ކައުންސިލްގެ ފުރިހަމަ ތާއީދާ އެކުކަމަށް އޭނާ ވިދާޅުވި އެވެ.

އާޒިމް ވިދާޅުވީ އޮޑިޓަރެއް ހަމަޖެއްސުމަކީ ހުރިހާ ކަމެއްގައި ވެސް ނަޒާހަތްތެރިކަން ކަށަވަރު ކުރުމަށް އެޅުނު ބިންގަލެއް ކަމަށާއި މާލެ ސިޓީގެ މުސްތަގުބަލު ބައްޓަންވެގެންދާނީ ދެފުށްފެންނަ ގޮތަށް މަސައްކަތް ކުރާ މުއައްސަސާއެއް ގޮތަށްކަމަށެވެ.

މާލެ ސިޓީ ކައުންސިލްގެ އިދާރާގެ އިންޓާނަލް އޮޑިޓަރުގެ މަސައްކަތް ހަވާލުކުރީ ކުރޯ މޯލްޑިވްސް އެލްއެލްޕީ އެވެ. އެ މަސައްކަތް ހަވާލުކޮށްފައިވަނީ ޖުމުލަ 466,560.00ރ. އަށެވެ.

މަސައްކަތުގެ މުއްދަތަކީ 2024 ވަނައަހަރު ޑިސެންބަރު މަހުގެ 26 ވަނަ ދުވަހުން ފެށިގެން 2026 ވަނައަހަރު ޑިސެންބަރު މަހުގެ 25 ވަނަ ދުވަހުގެ ނިޔަލަށް އަށް މީލާދީ 02 (ދޭއް) އަހަރު ދުވަސްކަމަށް ސިޓީ ކައުންސިލުން ބުނެ އެވެ.

ދާދިފަހުން ކުރީގެ ރައީސް އަބްދުﷲ ޔާމީން ވަނީ މާލޭ ސިޓީ ކައުންސިލްގެ އޮޑިޓެއް ނުހަދާތީ ކަންބޮޑުވުން ފާޅުކުރައްވާފަ އެވެ. އެ މަނިކުފާނު ވިދާޅުވި ގޮތުގައި، އެ ކައުންސިލަށް ދައުލަތުގެ ބަޖެޓުން ބޮޑު އަދަދެއް ދޭއިރު އެ ފައިސާ ހަރަދުވަނީ ރަނގަޅަށްތޯ ރައްޔިތުންނަށް އެނގެން ޖެހޭ ކަމަށެވެ.