ފްލެޓް ގަންނަ ފަރާތްތަކަށް ބޭންކް އޮފް މޯލްޑިވްސް (ބީއެމްއެލް) އިން ދޫކުރާ ލޯނު ދޫކުރާ މަޝްރޫއުތަކުގެ ލިސްޓްގައި ކަނޑޫފާ ރެސިޑެންސް މިހާތަނަށް ހިމެނިފައި ނުވާކަން ހާމަވެއްޖެ އެވެ.

ބީއެމްއެލްގެ ވެބްސައިޓްގައި އާއްމުކޮށްފައިވާ އެ ލިސްޓުގައި ލޯނު ދޫކުރަން ހަމަޖެހިފައިވާ ކުންފުނިތަކުގެ ލިސްޓްގައި "ކަނޑޫފާ އިންވެސްޓް" އިން ކުރިއަށް ގެންދާ "ކަނޑޫފާ ރެސިޑެންސް" ފުލެޓްތައް ނުހިމެނެ އެވެ. ނަމަވެސް އެ ލިސްޓްގައި ދާދިފަހުން ހުޅުމާލޭގައި އިމާރާތްކުރަން ފެށި އެހެން ތަންތަން ހިމެނިފައިވެ އެވެ.

ހުޅުމާލޭގައި ތަރައްގީކުރާ ކަނޑޫފާ ރެސިޑެންސް ފްލެޓްތަކާ ގުޅޭގޮތުން ދާދިފަހުން ވަނީ ސައްހަކަމާމެދު ސުވާލު އުފެދޭ ފަދަ މައުލޫމާތުތަކެއް އެ ކުންފުނީގެ ކުރީގެ މުވައްޒަފަކު ސޯޝަލް މީޑިއާގައި ހިއްސާކޮށްފަ އެވެ. އޭނާ ބުނާގޮތުން ކަނޑޫފާ ރެސިޑެންސް މަޝްރޫއު ހިންގާ ކުންފުންޏަކީ އެވަރުގެ މާލީ ތަނަވަސްކަމާއި ތަޖުރިބާ ހުރި ކުންފުންޏެއް ނޫނެވެ. މީގެ އިތުރުން ކުންފުނީގެ ހަގީގަތް ފޮރުވަން އޮޅުވާލާކަމަށް ވެސް އެ މުވައްޒަފު ވަނީ ބުނެފަ އެވެ.

https://hurihaa.mv/34505

ނަމަވެސް "ހުރިހާ" އަށް މައުލޫމާތު ދިން ކަނޑޫފާ އިންވެސްޓްމަންޓްގެ އޮފިޝަލަކު އެ މުވައްޒަފުގެ ވާހަކަތައް ދޮގުކުރެ އެވެ. އެ އޮފިޝަލް ފުރަތަމަ ބުނީ އެ ޕްރޮޖެކްޓްގެ ދަށުން ތަރައްގީކުރާ ފްލެޓްތަކަށް ލޯނު ހަމަޖައްސައިދެނީ ބީއެމްއެލް އާއި އެޗްޑީއެފްސީން ކަމަށެވެ. އަދި އެ ލިސްޓްގައި ކަނޑޫފާ ރެސިޑެންސް ނެތް ކަމަށް ބުނުމުން ފަހުން އޭނާ ބުނިގޮތުގައި ބޭންކުން ލޯނު ދޫކުރުމަށް ހަމަޖެހިފައިވަނީ އެތަނުގެ ދެވަނަ ފްލޯގެ ޝީޓް އަޅައި ނިމުމުންނެވެ. އަދި މިހާރު ވެސް މަޝްރޫއުގެ ގިނަ މަސައްކަތްތަކެއް ބާރު ސްޕީޑްގައި ކުރިއަށްދާ ކަމަށް އޭނާ ބުންޏެވެ.

"ދެވަނަ ފްލޯގެ ޝީޓް އަޅައި ނިމުމުން ފެންނާނެ [ލިސްޓްގައި ނަން އޮންނަ ތަން]. އެހެންވެ އަހަރެމެންނަށް ޑައުންޕޭމަންޓް ނުލިބިގެން މިއުޅެނީ،" އެ އޮފިޝަލް ބުންޏެވެ.

https://www.facebook.com/photo?fbid=122108026370673449&set=pcb.122108026544673449

އެ މަޝްރޫއާ ބެހޭ ގޮތުން އެ ކުންފުނިން ބުނީ މިހާރު ކުރިއަށް ދަނީ އިމާރާތުގެ ގްރައުންޑް ފުލޯގެ މަސައްކަތް ކަމަށާއި މަޝްރޫއު ޕްލޭނާއި އެއްގޮތަށް ކުރިއަށްދާ ކަމަށެވެ. ޕްރޮޖެކްޓްގެ މަސައްކަތަށް ބޭނުން ކުރަނީ ޗައިނާގެ ޒަމާނީ ޓެކްނޮލޮޖީއާއެކު އެންމެ ފަހުގެ ވަސީލަތްތައް ކަމަށް ވެސް އެ ކުންފުނިން ބުނެ އެވެ.

މީގެ އިތުރުން މިހާރު ވަނީ މަސްރޫއުގެ 8 ފްލޯ އިމާރާތް ކުރާނެ ހުރިހާ އެއްޗެއް ރާއްޖެ ގެނެސްފައިވާ ކަމަށާއި މިހާރު 12 ވަނަ ފްލޯއަށް ބޭނުންވާ ސާމާނު މިހާރު ޗައިނާއިން ރާއްޖެ ގެނައުމުގެ މަގުމަތީގައިވާ ކަމަށް ވެސް އެ ކުންފުނިން ބުނެ އެވެ.

"ކާނޑޫފާ ރެސިޑެންސް" މަޝްރޫއު ފެށުމަށް ހުއްދަ ދީފައިވަނީ ނިމިދިޔަ ސަރުކާރުގަ އެވެ.