ހޮލީވުޑްގެ މަޝްހޫރު ތަރި ޖޮނީ ޑެޕްއާއި އޭނާ އަށްވުރެ 40 އަހަރު ހަގު އެކްޓަރެއް ކަމަށްވާ ޖެނާ އޮޓެގާއާ އަޅުވާ ކިޔާތީ އޭނާގެ ޓީމުން އެ އަޑުތަކަށް ރައްދު ދީފި އެވެ.

ޖޮނީގެ ޓީމުން ނެރުނު ބަޔާނެއްގައި ބުނެފައިވަނީ ޖެނާއާއި ޖޮނީ އެއްވެސް އިރެއްގައި ބައްދަލުވެފައި ނުވާ ކަމަށާއި އެއްވެސް ޕްރޮޖެކްޓެއްގައި އެކުގައި މަސައްކަތް ވެސް ކޮށްފައިނުވާނެ ކަމަށެވެ.

މީގެ ކުރިން ޖެނާ ވެސް ވަނީ އެ އަޑުތަކަށް ރައްދުދީފަ އެވެ. އޭނާގެ އިންސްޓަގްރާމް ސްޓޯރީގައި ހިއްސާކުރި ޕޯސްޓެއްގައި ބުނެފައިވަނީ އެ ދެމީހުންގެ މެދުގައި އެއްވެސް ގުޅުމެއް ނެތް ކަމަށާއި ދޮގު ހަބަރު ފެތުރުން ހުއްޓާލަން ޖެހޭ ކަމަށެވެ.

އުމުރުން 61 އަހަރުގެ ޖޮނީއާއި 22 އަހަރުގެ ޖެނާ ޓިމް ބާޓަންގެ "ބީޓަލްޖޫސް 2"އިން ވެސް އެކުގައި ފެންނާނެ ކަމަށް ވެސް ހަބަރުތައް ފެތުރިފައިވެ އެވެ.

ޖޮނީ ޑެޕްގެ ޒާތީ ހަޔާތަކީ އަބަދުވެސް މީޑިއާގެ ސަމާލުކަން އަމާޒުވާ ކަމެކެވެ. އެގޮތުން އެކިފަހަރު މަތިން އެކި ތަރިންނާއެކު ޖޮނީ ޑެޕް ލޯބީގެ ގޮތުން ގުޅިފައިވާ ކަމަށް ރިޕޯޓުތައް ބުނެ އެވެ.

އެގޮތުން ޖޮނީއާއި އޭނާގެ ކުރީގެ އަންހެނުން އެމްބާ ހާޑްގެ ގުޅުމަކީ މީޑިއާގެ ސަމާލުކަން އެންމެ ބޮޑަށް އަމާޒުވި އެއް ގުޅުމެވެ. އެ ދެތަރިންގެ މެދުގައި ކުރިއަށް ދިޔަ ގާނޫނީ ކުރިމަތިލުމުގެ ހަބަރުތައް މީޑިއާގެ ފަލަ ސުރުހީތަކުން ޖާގަ ހޯދާފައިވެ އެވެ.