ކާމިޔާބު ލަވަކިޔުންތެރިޔާ މިކާ ސިންހް ފިލްމު އުފެއްދުން ހުއްޓާލީ ބޮލީވުޑްގެ އެކްޓަރުން ކަމަށްވާ ބިޕާޝާ ބާސޫއާއި އޭނާގެ ފިރިމީހާ ކަރަން ސިންހް ގްރޯވާގެ ސަބަބުން ކަމަށް މިކާ ބުނެފި އެވެ.

ދާދި ފަހުން މީޑިއާއަށް ދިން އިންޓަވިއުއެއްގައި މިކާ ވަނީ އޭނާ ޕްރޮޑިއުސްކުރި ހަމައެކަނި ފިލްމު "ޑޭންޖަރަސް"ގައި ބިޕާޝާއާއި ކަރަންއާއެކު މަސައްކަތް ކުރުމުގެ ތަޖުރިބާ ކިޔައިދީފަ އެވެ.

މިކާ ބުނީ އޭނާ އެންމެ ފުރަަތަމަ ބޭނުންވީ ކަރަންއާއެކު އާ އެކްޓަރެއް ބޭނުން ކުރަން ކަމަށާއި ބިޕާޝާ ފިލްމަށް ނެގީ އޭނާގެ އެދުމުގެ މަތިން ކަމަށެވެ. އެހެން ނަމަވެސް އޭނާގެ އެ ނިންމުމުގެ ސަބަބުން ފިލްމު އުފެއްދުމުގައި ގިނަ ގޮންޖެހުންތަކެއް ކުރިމަތިވި ކަމަށް މިކާ ބުނެފައިވެ އެވެ.

އެގޮތުން އެ ދެމީހުންގެ ސަބަބުން ފިލްމުގެ ހަރަދުތައް އެތައް ގުނައެއް އިތުރުވި ކަމަށާއި ކައިވެނި ކޮށްގެން ހުރެވެސް ވަކިވަކި ކޮޓަރި ބޭނުންވުމާއި ބައެއް މަންޒަރުތައް ކުޅެން ދެކޮޅު ހެދުން ފަދަ ކަންތައް ކުރިމަތިވި ކަމަށް މިކާ ބުންޏެވެ.

މިކާ އިތުރަށް ބުނީ އޭނާ ފިލްމެއް އުފައްދަން އުޅުމުން އެއީ ރަނގަޅު ކަމެއް ނޫން ކަމަށް އަކްޝޭ ކުމާރުއާއި ސަލްމާން ޚާން ވެސް ލަފާދިން ކަމަށާއި އެމީހުންގެ އަޑު ނޭހުނީތީ ދެރަވާ ކަމަށެވެ.

މިހުރިހާ ކަމަކާއެކު ފިލްމު އުފެއްދުމުގައި ހުރި ގޮންޖެހުންތައް ވިސްނި އެކަމުން ދުރަށް ދާން ގަސްދުކުރީ ކަމަށް މިކާ ބުނެފައިވެ އެވެ.