މިދިޔަ އަހަރު އެމެރިކާގެ ލޮސް އެންޖެލަސްގައި ހުންނަ ހޮލީވުޑްގެ އެކްޓަރު ކިއާނޫ ރީވްސްގެ ގެއިން ވަގަށް ނަގާފައިވާ ރޮލެކްސް ގަޑިއަކާއެކު ކިއާނޫގެ ޖުމްލަ ތިން ގަޑިއެއް ޗިލީއިން ހޯދައިފި އެވެ.

ހަބަރުތައް ބުނާ ގޮތުގައި މީގެ އަހަރެއްހާ ދުވަސް ކުރިން ވަގަށް ނަގާފައިވާ އެ ތަކެތި ހޯދާފައިވަނީ ޗިލީގެ ފުލުހުން ހިންގި އޮޕަރޭޝަނެއްގެ ތެރެއިންނެވެ. އެކަން ޗިލީގެ ފުލުހުން ޔަގީން ކޮށްދީފައިވާއިރު މިކަމާ ގުޅިގެން ކުރަންޖެހޭ ކަންކަން ކުރުމަށް އެމެރިކާގެ އިދާރާތަކާއެކު ޗިލީގެ ފުލުހުން މަސައްކަތް ކުރަމުން އަންނަ ކަމަށް ހަބަރުތައް ބުނެ އެވެ.

މި ވައްކަމާ ގުޅިގެން 21 އަހަރުގެ މީހަކު ހައްޔަރު ކުރެވިފައިވާއިރު ތަހުގީގު އަދިވެސް ކުރިއަށްދާ ކަމަށް ފުލުހުންނާ ހަވާލާދީ މީޑިއާއިން ބުނެފައިވެ އެވެ. 9000 އެމެރިކާ ޑޮލަރުގެ ރޮލެކްސް ގަޑިއަކާއި އެހެން ގަޑިތަކެއް ކިއާނޫގެ ގެއިން ވަގަށް ނަގާފައިވަނީ 2023 ވަނަ އަހަރުގެ ކުރީކޮޅު އެވެ.

އެ މައްސަލަ ފުލުހުންނަށް ހުށައެޅި އަހަރެއް ފާއިތުވެގެން ދިޔައިރު އެމެރިކާ ފުލުހުންގެ ފަރާތުން މާބޮޑު ކުރިއެރުމެއް ލިބިފައެއް ނުވެ އެވެ.

ކިއާނޫއަކީ ހޮލީވުޑްގެ މަޝްހޫރު ފިލްމު ފްރެންޗައިޒް "ޖޯން ވިކް"ގެ ފިލްމުތަކުން އާއްމުންގެ މަގުބޫލުކަން ހޯދި ފަންނާނެކެވެ. އޭނާ ދެން އެންމެ އަވަހަށް ފެނަނާނީ އެ ފްރެންޗައިޒްގެ ސްޕިން އޮފް ފިލްމެއްގެ ކެމިއޯ ރޯލަކުން ކަމަށް ބެލެވެ އެވެ.