މީލާދީ އަހަރެއް ނިމި، މިރެއަކީ އާ އަހަރެއް ފެށޭ ރެ އެވެ. އާ ފެށުންތަކާއި އާ ވާހަކަތަކުގެ ރެ އެވެ. މިރެއަކީ ދުނިޔޭގެ އެކި ކަންކޮޅުތަކުގައި ކުލަގަދަކޮށް ފާހަގަ ކުރެވޭ ރެ އެކެވެ.

އެކަމުގައި އަހަރުމެން ދިވެހިން ވެސް އުޅެނީ ފަހަތުގައޭ ބުނެވޭކަށް ނެތެވެ. އާ އަހަރު ފާހަގަކުރުން މިހާރު ވެފައި ވަނީ އަހަރުމެންގެ ވެސް ސަގާފަތަކަށެވެ.

އިއްތިފާގުން މިފަހަރުގެ އާ އަހަރާއެކު ސްކޫލު ޗުއްޓީއާއި ސަރުކާރު ބަންދު ފަސް ދުވަސް ލިބުމުން އެކަމުގެ ޖޯޝް ވަނީ ދެގުނައަށް އިތުރުވެފަ އެވެ. އެގޮތުން އެއްބަޔަކު ބޮޑު ހަރަދުކޮށްފައި އާއިލާއާއެކު ރާއްޖެއިން ބޭރަށް ދެ އެވެ. އަނެއް ބަޔަކު ތަފާތު ހަރަކާތްތަކާއެކު ޕާޓީތައް ބާއްވަ އެވެ. އެންމެ ދަށް ފަންތީގެ މީހުން ވެސް ކުޑަމިނުން އާއިލާއާއި ރަހުމަތްތެރިންނާއެކު ރެސްޓޯރެންޓަކުން ކެއުމަކަށް އިންސާފު ކުރެވޭތޯ މަސައްކަތް ކުރެ އެވެ.

އެހެން ނަމަވެސް ސުވާލަކީ އަހަރުމެންގެ އިސްލާމްދީނުގެ ސަގާފަތާ ހިލާފު ކަމަކަށް މިހާ ބޮޑު ހަރަދުތައް ކުރަން ޖެހޭތޯ އެވެ. އާ އަހަރު ފާހަގަ ކުރުމުގެ ނިޔަތުގައި ޣައިރު މުސްލިމުންގެ ސަގާފަތްތަކަށް ބޯލަނބަން ޖެހޭތޯ އެވެ.

ތެދެކެވެ. އާއިލާއާއާއި ރަހުމަތްތެރިންނާއެކު ވަގުތު ހޭދަކުރުމަކީ މައްސަލައެއް ނޫނެވެ. އެކަމަށް ވަކި ދުވަހެއް ވެސް ނޯވެ އެވެ. އެހެން ނަމަވެސް މައްސަލައަކަށް ވަނީ އެކަންކަން ކުރުމުގެ "ބަހަނާއަކަށް" އާ އަހަރު ފާހަގަކުރުން ވާ ހިސާބުންނެވެ.

އާއަހަރު ފާހަގަ ކުރަން ބޭނުންނަމަ އަތުން ހަރަދުތަކެއް ނުކޮށް ވެސް އެކަން ކުރެވިދާނެ އެވެ. އާ އަހަރަށް އާ އަޒުމެއް ކަނޑައެޅުމާއި ފާއިތުވި އަހަރާމެދު ވިސްނައި ފިކުރުކޮށް ކުރިއަށް އޮތް އަހަރު ބައްޓަން ކުރާނެ ގޮތް ރާވައި "ޖާނަލް"އެއް ލިޔެވިދާނެ އެވެ.

އާއިލާއާއި ގާތް ރަހުމަތްތެރިންނާއެކު ގޭގައި ކެއުމަކަށް އިންސާފު ކުރެވިދާނެ އެވެ. ދުރުގައިވާ ގާތް ފަރާތްތަކަށް ގުޅައި ހާލު އަހުވާލު ބަލާލެވިދާނެ އެވެ.

މިއީ ހައްތަހާ ވެސް އާ އަހަރު ފާހަގަ ކުރަން ބޭނުންނަމަ އަތުން ހަރަދެއް ނުކޮށް ކުރެވިދާނެ ކަންކަމެވެ. އެހެން ކަމުން އާ އަހަރު ފާހަގަ ކުރަން ކޮންމެހެން އަތުން ބޮޑެތި ހަރަދުތައް ކުރާކަށް ނުޖެހެއޭ ބުނެވިދާނެ އެވެ.