ރައީސް ޑރ. މުހައްމަދު މުއިއްޒުގެ ވެރިކަން ބަދަލުކުރަން އިންޑިއާ އިން ރާއްޖޭގެ އިދިކޮޅު ފަރާތްތަކާ ގުޅިގެން މަސައްކަތް ކުރި ކަމަށް ވޮޝިންޓަން ޕޯސްޓްގައި ރިޕޯޓްކޮށްފައި ވިޔަސް އިންޑިއާއިން އެފަދަ ކަމެއް ނުކުރާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

އިންޑިއާ އިން ރާއްޖޭގެ އިދިކޮޅު ފަރާތްތަކާ ގުޅިގެން ރައީސް މުއިއްޒުގެ ވެރިކަން ވައްޓާލަން އުޅޭ ކަމަށް ވޮޝިންޓަން ޕޯސްޓުގައި 'އަ ޕްލޮޓު އިން ޕެރަޑައިސް އެންޑް އިންޑިއާސް ސްޓްރަގްލް ފޯ އިންފުލުއެންސް އިން އޭޝިއާ'، މި ސުރުހީގެ ދަށުން މިއަދު ޝާއިއުކޮށްފައިވާ ލިޔުމުގައި ބުނެފައިވެ އެވެ.

އިންޑިއާގެ ޖާސޫސީ އިދާރާ ރޯ އިން 'ޑިމޮކްރެޓިކް ރިނިއުވަލް އިނިޝިއޭޓިވް'ގެ ނަމުގައި ތައްޔާރުކޮށްފައިވާ ކަމަށް ބުނާ ލިޔުމަކާ ހަވާލާދީ ވޮޝިންޓަން ޕޯސްޓްގައި ބުނެފައި ވަނީ އިންޑިއާ އިން ރާއްޖޭގެ އިދިކޮޅު ފަރާތްތަކާ އެކު މަޝްވަރާ ކުރަން ފެށީ މިދިޔަ ޖެނުއަރީގަ މަހު ކަމަށެވެ.

ނަމަވެސް އެ ވާހަކަތައް ދޮގުކުރައްވައި އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ އިންޑިއާއިން އެފަދަ ކަމެއް ދުވަހަކު ވެސް ނުކުރާނެ ކަމަށެވެ.

އެމަނިކުފާނު ވިދާޅުވީ އިންޑިއާ އިން ރާއްޖޭގެ ޑިމޮކްރެސީއަށް އަބަދުވެސް ތާއީދު ކުރާ ކަމަށާއި ވަކިގޮތަކަށް ކަމެއް ކުރުމަށް އިންޑިއާއިން ދުވަހަކުވެސް ރާއްޖެއަށް ޝަރުތު ނުކުރާ ކަމަށެވެ.

ވޮޝިންޓަން ޕޯސްޓުގައި ލިޔެފައިވާ ލިޔުމުގައި އިތުރަށް ބުނެފައި ވަނީ ރައީސް މުއިއްޒުގެ ވެރިކަން ވައްޓާލުމަށް ރައްޔިތުންގެ މަޖިލީހުގެ 40 މެންބަރަކަށް ރިޝްވަތު ދިނުމަށާއި ސަލާމަތީ ބާރުތަކުގެ އިސް 10 އޮފިޝަލަކަށް އަދި ރާއްޖޭގައި ހަރަކާތްތެރިވާ ބާރުގަދަ ތިން ގޭންގަކަށް ހަ މިލިއަން ޑޮލަރު ދޭން އިދިކޮޅު ފަރާތްތަކުން އިންޑިއާއަށް ހުށަހެޅި ކަމަށެވެ.

ސަރުކަރު ވައްޓާލަން ކުރި އެ ސިއްރު މަޝްވަރާތަކުން އެއްވެސް ކުރިއެރުމެއް ނުލިބުނު ކަމަށް ވެސް އެ ލިޔުމުގައިވެ އެވެ.

މިކަމާ ގުޅޭގޮތުން ސަރުކާރުން އަދި ވަކިއެއްޗެއް ނުބުނެ އެވެ.