2024 ވަނަ އަހަރުގެ ފިލްމު "އިޓް އެންޑްސް ވިތު އަސް"ގެ ތަރި ޖަސްޓިން ބެލްޑޯނީ އެމެރިކާގެ ނޫހެއް ކަމަށްވާ "ނިއުޔޯކް ޓައިމްސް"އާ ދެކޮޅަށް ދައުވާ އުފުލައިފި އެވެ.

ލޮސް އެންޖެލަސް ސުޕީރިއާ ކޯޓަށް ޖަސްޓިން ހުށައެޅި ދައުވާގައި ބުނެފައިވަނީ އޭނާއަށް "އިޓް އެންޑްސް ވިތު އަސް"ގައި މަސައްކަތްކުރި ބްލޭކް ލައިވްލީ ކޮށްފައިވާ ޖިންސީ ފުރައްސާރައިގެ ތުހުމަތުތަކާ ގުޅިގެން އެ ނޫހުން އާއްމު ކޮށްފައިވާ ލިޔުމަކީ ދޮގު މައުލޫމާތު ހިމެނޭ ލިޔުމެއް ކަމަށެވެ.

އެ ލިޔުމުގައި ހިމަނާފައިވަނީ ހަމައެކަނި ބްލޭކްގެ ފަރާތުން ދީފައިވާ މައުލޫމާތު ކަމަށާއި އޭނާގެ މައްޗަށް ކޮށްފައިވާ ތުހުމަތުތަކަށް ބާރުދޭ ފަދަ ގޮތަކަށް އެ ލިޔުން އިބާރާތް ކުރެވިފައިވާ ކަމަށް ޖަސްޓިން ބުނެ އެވެ.

އެގޮތުން ޖަސްޓިން ވަނީ އެ ހަބަރުގެ ސަބަބުން އޭނާގެ އަބުރަށް ގެއްލުންވި ކަމަށް ބުނެ ބަދަލުގައި 250 މިލިއަން ޑޮލަރު ހޯދައިދިނުމަށް އެދިފަ އެވެ.

ޖަސްޓިން ނިއުޔޯކް ޓައިމްސްއާ ދެކޮޅަށް ދައުވާ ކޮށްފައި މިވަނީ ޖިންސީ ފުރައްސާރައިގެ ތުހުމަތުގައި ބްލޭކް ޖަސްޓިންއަށް ވެސް ދައުވާ ކޮށްފައި ވަނިކޮށެވެ.

އެ މައްސަލައިގެ ސަބަބުން ހޮލީވުޑްގައި ޖަސްޓިންއަށް ގިނަ ގޮންޖެހުންތަކެއް ކުރިމަތިވަމުން އަންނައިރު އޭނާއަށް ލިބިފައިވާ ބައެއް އެވޯޑުތައް ވެސް ވަނީ އަތުލާފަ އެވެ.