އެންމެ ފަހުން ޖަސްޓިން ބެލްޑޯނީ ވެސް ބްލޭކް ލައިވްލީއާ ދެކޮޅަށް ދައުވާ ކުރަން އޭނާގެ ޓީމުން ނިންމައި އެކަން އިއުލާން ކޮށްފި އެވެ.

ޖަސްޓިންގެ ގާނޫނީ ޓީމުން މިފަހުން ބުނެފައިވަނީ ބްލޭކްއާ ދެކޮޅަށް ކުރާ ދައުވާގެ ކަންކަން ކުރަމުން އަންނަ ކަމަށާއި އޭރުން އާއްމުންނަށް ވެސް ކަމުގެ ދެކޮޅު ފެންނާނެ ކަމަށެވެ.

އެގޮތުން ޖަސްޓިންގެ ދައުވާ ލިބޭ މީހުންގެ ތެރޭގައި ބްލޭކްގެ އިތުރުން ބްލޭކްގެ ޕަބްލިސިސްޓް ލެސްލީ ސްލޯން އަދި ޖަސްޓިންގެ ކުރީގެ ޕަބްލިސިސްޓް ސްޓެފަނީ ޖޯންސް ހިމެނެ އެވެ.

ޖަސްޓިން ބްލޭކްއަށް ދައުވާކުރަން ނިންމާފައި މިވަނީ ޖިންސީ ފުރައްސާރައާއި އަބުރަށް ގެއްލުންދިނުމުގެ ދައުވާ ބްލޭކް ޖަސްޓިންއަށް ކޮށްފައި ވަނިކޮށެވެ.

އެ ދައުވާގައި ބްލޭކް ބުނެފައިވަނީ އޭނާއާއި ޖަސްޓިން އެކުގައި މަސައްކަތްކުރި ދުވަސްވަރު ޖަސްޓިން އޭނާއަށް ޖިންސީ ފުރައްސާރަ ކޮށްފައިވާ ކަމަށެވެ.

ޖަސްޓިންއާއި ބްލޭކް އެކުގައި މަސައްކަތް ކޮށްފައިވަނީ މިދިޔަ އަހަރު ރިލީޒް ކުރެވުނު ކާމިޔާބު ފިލްމު "އިޓް އެންޑްސް ވިތު އަސް"ގަ އެވެ.