ބޮލީވުޑްގެ މަޝްހޫރު ތަރި ކިއާރާ އަދްވާނީގެ ހާލު ދެރަވެ ހޮސްޕިޓަލުގައި އެޑްމިޓްކޮށް ފަރުވާ ދީފައިވާ ކަމަށް އިންޑިއާގެ ހަބަރުތައް ބުނެފި އެވެ.

ރިޕޯޓުތައް ބުނާ ގޮތުގައި ކިއާރާ ހޮސްޕިޓަލަށް ގެންދެވުނީ ވަރުދެރަވެ އެކަމުގެ ސަބަބުން ކުރިމަތިވި އުނދަގޫތަކާއެކުގަ އެވެ. އެހެން ނަމަވެސް ފަރުވާ ދިނުމަށްފަހު ދޫކޮށްލާފައިވާ ކަމަށްވެސްވެ އެވެ.

ކިއާރާގެ ޓީމުން ބުނީ އޭނާ ވަނީ ފާއިތުވި ދުވަސްތަކުގައި މެދުކެނޑުމެއް ނެތި ވަރަށް ބުރަކޮށް މަސައްކަތް ކޮށްފައި ކަމަށާއި އެހެން ކަމުން އަރާމު ކުރުމަށް ޑޮކްޓަރުން ލަފާދީފައިވާ ކަމަށެވެ.

ކިއާރާގެ ހާލު ގޯސްވުމުގެ ސަބަބުން ހޮނިހިރު ދުވަހު ބޭއްވި އޭނާގެ ކުރިއަށް އޮތް ފިލްމު "ގޭމް ޗޭންޖާ"ގެ ޓްރެއިލާ ނެރުނު ހަފްލާއަކަށް ވެސް ނުދެ އެވެ.

ބުނެވޭ ގޮތުގައި އެ ފިލްމަކީ އިންޑިއާގެ ސިޔާސީ މަޝްރަހާއި ކޮރަޕްޝަންގެ ކަންތައްތައް ދައްކުވައިިދޭ ފިލްމެކެވެ. އެ ފިލްމުގައި ކިއާރާ ކުޅޭނީ "އިންޑިއަން އެޑްމިނިސްޓްރޭޓިވް ސާވިސް"ގެ އޭޖެންޓެއްގެ ރޯލެވެ.

މި ފިލްމު އާއްމުކޮށް ސިނަމާތަކުގައި ރިލީޒް ކުރަން ހަމަޖެހިފައިވަނީ މި ޖެނުއަރީ މަހުގެ 10 ވަނަ ދުވަހު ކަމަށް ރިޕޯޓުތައް ބުނެ އެވެ.