ހޮލީވުޑްގެ މަޝްހޫރު ދެ ތަރިން ކަމަށްވާ ޓޮމް ހޮލޭންޑްއާއި އޭނާގެ ލޯބިވެރިޔާ ޒެންޑާޔާ އެންމެ ފަހުން އެންގޭޖް ވެއްޖެ ކަމަށް ރިޕޯޓުތައް ބުނެފި އެވެ.

މި އަޑުތައް ފެތުރިފައި މިވަނީ އާދީއްތަ ދުވަހު ބޭއްވި ގޯލްޑަން ގްލޯބް އެވޯޑްސްގައި ޒެންޑާޔާ ބައިވެރިވިއިރު އޭނާގެ އިނގިލީގައި އެންގޭޖްމަންޓް އަނގޮޓިއެއް އޮތުމުންނެވެ.

ރިޕޯޯޓުތައް ބުނާ ގޮތުގައި އެ އަނގޮޓީގެ އަގު ގާތްގަނޑަކަށް 200،000 ޑޮލަރަށް އަރާނެ އެވެ. އެއީ ޓޮމް ޒެންޑާޔާއަށް ކައިވެނި ހުށައެޅި ކަމުގެ ހެއްކެއް ކަމަށް ވެސް ރިޕޯޓުތައް ބުނެ އެވެ.

ޒެންޑާޔާއާއި ޓޮމް ލޯބީގެ ގޮތުން ގުޅިފައިވަނީ އެ ދެމީހުން އެކުގައި މަސައްކަތްކުރި "ސްޕައިޑާ މޭން"ގެ ފުރަތަމަ ފިލްމުގެ ތެރެއިން 2017 ވަނަ އަހަރު އެވެ. އެ ދެމީހުންގެ ގުޅުން އާއްމު ކޮށްފައިވަނީ 2021 ވަނަ އަހަރު އެވެ.

މީގެ ކުރިން ވެސް އެތައް ފަހަރެއްގެ މަތިން ޓޮމްއާއި ޒެންޑާޔާގެ ކައިވެނީގެ ހަބަރުތައް މީޑިއާގައި ފެތުރިފައިވެ އެވެ. އެހެން ނަމަވެސް އެއިން އެއްވެސް ފަހަރަކު އެ ދެތަރިން އެކަން ޔަގީން ކޮށްދީފައެއް ނުވެ އެވެ.

82 ވަނަ ގޯލްޑަން ގްލޯބް އެވޯޑްސްގައި ޒެންޑާޔާއަށް ނޮމިނޭޝަންތަކެއް ލިބިފައިވީ ނަމަވެސް އޭނާއާއެކު އެ ހަފްލާގައި ޓޮމް ބައިވެރިވެފައެއް ނުވެ އެވެ.