82 ވަނަ ގޯލްޑަން ގްލޯބް އެވޯޑްސް މިދިޔަ ހޯމަ ދުވަހު ބާއްވާފައިވާއިރު އެ އެވޯޑްސްގައި ނެޓްފްލިކްސްގެ ފިލްމު "އެމީލިއާ ޕެރޭޒް"އަށް ބޮޑު ކާމިޔާބެއް ލިބިއްޖެ އެވެ.

ސެލީނާ ގޯމޭޒް ލީޑު ރޯލުން ފެނިގެންދާ އެ ސްޕެނިޝް ފިލްމަށް ގޯލްޑަން ގްލޯބްސްގައި ޖުމްލަ ހަތަރު އެވޯޑެއް ލިބިފައިވެ އެވެ. އެއީ އެއް ފިލްމަކަށް އެންމެ ގިނައިން ލިބުނު އެވޯޑުގެ އަދަދެވެ.

އެގޮތުން އެ ފިލްމަށް ކާމިޔާބު ލިބުނު ކެޓަގަރީތަކަކީ ބެސްޓް މޯޝަން ޕިކްޗާ (ކޮމެޑީ/މިއުޒިކަލް)، ބެސްޓް އޮރިޖިނަލް ސޯންގް، ބެސްޓް ސަޕޯޓިން އެކްޓްރެސް އަދި ބެސްޓް ނޮން އިންގްލިޝް ލެންގުއޭޖް ފިލްމު އެވެ.

"އެމީލިއާ ޕެރޭޒް"އަށް ޖުމްލަ ހަތަރު އެވޯޑު ލިބިފައިވަނީ އެ ފިލްމު ނޮމިނޭޓްވި 8 ކެޓަގަރީގެ ތެރެއިންނެވެ. އެ ފިލްމަށް ކާމިޔާބުނުވި ކެޓަގަރީތަކުގެ ތެރޭގައި ބެސްޓް އެކްޓްރެސް، ބެސްޓް ޑިރެކްޓަރު އަދި ބެސްޓް ސްކްރީން ޕްލޭ ހިމެނެ އެވެ.

މިދިޔަ އަހަރުގެ އޮގަސްޓް މަހު ނެޓްފްލިކްސްގައި ރިލީޒްކުރި "އެމީލިއާ ޕެރޭޒް"އަށް ކުޑަ ދުވަސްކޮޅެއްގެ ތެރޭގައި އާއްމުންގެ ބޮޑު ތަރުހީބެއް ލިބިފައިވެ އެވެ.

އެމީލިއާ ޕެރޭޒްގެ އިތުރުން ގޯލްޑަން ގްލޯބްސްގައި ވިދާލި އެހެން ފިލްމުތަކުގެ ތެރޭގައި ބްރެޑީ ކޯބެޓްގެ ފިލްމު "ބްރޫޓަލިސްޓް" ހިމެނެ އެވެ. އެ ފިލްމަށް ޖުމްލަ ތިން އެވޯޑެއް ލިބިފައިވެ އެވެ.