ވޭޕް މަނާކުރުމުންނާއި ދުންފަތުގެ ބާވަތްތަކުގެ އަގުބޮޑުކުރުމުން ކުރިމަތިވެވަޑައިގެންފައިވާ ފާޑުކިޔުންތަކަށް ރައީސް ޑރ. މުހައްމަދު މުއިއްޒު މިއަދު ރައްދު ދެއްވައިފި އެވެ.

ގދ. ވާދޫ ރައްޔިތުންނާ ބައްދަލުކުރައްވައި މިއަދު ދެއްކެވި ވާހަކަފުޅުގައި ރައީސް ވިދާޅުވީ ޒަމާންތަކެއް ވަންދެން ދިވެހީންގެ ތެރެއިން ބަޔަކު ދެވިހިފާފައިވާ ނުރަނގަޅު އާދަތަކުން ސަލާމަތްކޮށްދޭން އެމަނިކުފާނު ފިޔަވަޅު އަޅުއްވާފައިވާނެ ކަމަށެވެ. އަދި އެފަދަ ކަންކަމުގައި ރައްޔިތުންގެ އެއްބާރުލުމަށް އެމަނިކުފާނު އެދިވަޑައިގަތެވެ.

ރައީސް ވިދާޅުވީ މުސްތަގްބަލަށްޓަކައި، ޖީލުތައް ސަލާމަތް ކުރުމަށް ބައެއް އުނދަގޫ ނިންމުންތައް ނިންމަން ޖެހޭ ކަމަށެވެ.

"އެއްގޮތަކަށް ވެސް ރައްޔިތުންނަށް އުނދަގޫކުރުމަށް، ދަތިކުރުމަށް ކުރާ ކަންކަމެއް ނޫން،" ރައީސް ވިދާޅުވި އެވެ.

ވޭޕް މަނާކުރުމާއި ދުންފަތުގެ ބާވަތްތަކުގެ އަގު ބޮޑުކުރުމުގައި އެމަނިކުފާނުގެ އޮތީ ހެޔޮ ނިޔަތްކަން ވަރަށް ސާފުކޮށް އެމަނިކުފާނު ވިދާޅުވި އެވެ.

"އަޅުގަނޑުމެންގެ ތެރޭގައި ހުރި އެކިއެކި ވަބާތަކުން ގައުމު ސަލާމަތް ކުރުމަށް، އަޅުގަނޑުމެންގެ ތެރޭގައި އަަށަގަނެފައި ހުރި، މޫލާފައި ދެވިހިފާފައި ހުރި ބައެއް އާދަތަކުން ހިތްވަރު ލާފައި ސަލާމަތްކޮށްދިނުމުގެ ނިޔަތުގައި ކުރާ ކަންކަން މިއީ،" ރައީސް ވިދާޅުވި އެވެ.

މުޖުތަމައުއަކީ ހެޔޮކަންކަމަށް އަމުރުކޮށް، ނުބައި ކަންކަން ނަހީކުރާ މުޖުތަމައުއަކަށް ބަދަލު ކުރުމަކީ ވެސް ތަރައްގީ ކަމަށް ރައީސް ވިދާޅުވި އެވެ.