ދުވާލަކު 100 ޓަނުގެ ދަޅުމަސް ބަންދުކުރެވޭނެ ބޮޑު މަސްކާރުހާނާއެއް ގދ. ފިޔޯރީގައި ހެދުމުގެ އެއްބަސްބުމެއްގައި އަންނަ މަހު ޗައިނާގެ ކުންފުންޔަކާއެކު ސޮއި ކުރާނެ ކަމަށް ރައީސް މުހައްމަދު މުއިއްޒު އިއުލާން ކުރައްވައިފި އެވެ.

ގއ އަދި ގދ އަތޮޅަށް ރައީސް މިހާރު ކުރައްވަމުން ގެންދަވާ ދަތުރުފުޅުގައި ރޭ ފިޔޯރީގައި ވާހަކަފުޅު ދައްކަވަމުން ވިދާޅުވީ އެ ސަރަހައްދުގައި މަސްވެރިކަމަކީ އެންމެ މުހިއްމު ސިނާއަތް ކަމަށްވާތީ ފިޔޯރީ އަށް އެންމެ މުހިއްމު ވާނީ މަސްވެރިކަމާ ގުޅުން ހުރި ކަމެއް ކޮށްދިނުން ކަމަށް ދެކެވަޑައިގަންނަވާ ކަމަށެވެ.

ފިޔޯރީގައި މަސްކާރުހާނާ އެޅުމަކީ ރައީސް މުއިއްޒުގެ ރިޔާސީ ވައުދެފުޅެކެވެ.

ރައީސް ވިދާޅުވީ ވައުދުފުޅާ އެއްގޮތަށް މަސްކާރުހާނާގެ އަމަލީ މަސައްކަތް ފެށުމަށް އަންނަ މަހު ޗައިނާގެ ބަޔަކާ އެކު އެއްބަސްވުމެއްގައި ސޮއިކުރާނެ ކަމަށެވެ.

އެ ފެކްޓްރީގައި ދުވާލަކު 100 ޓަނުގެ ދަޅުމަސް ބަންދުކުރެވުމުގެ އިތުރުން ތިންހާސް ޓަނުގެ ކޯލްޑް ސްޓޯރޭޖް އަދި ފަންސާސް ޓަނުގެ އައިސް ޕްލާންޓެއް ހުންނާނެކަމަށް ރައީސް ވިދާޅުވި އެވެ.

މިހާރު މަޝްވަރާ ގޮސްފައިވާ ހިސާބަށް ބަލާއިރު، އަންނަ މަހު އެއްބަސްވުމުގައި ސޮއިކޮށް، އޭގެ ދެ މަސް ދުވަހުގެ ތެރޭގައި އަމަލީ މަސައްކަތް ފެށޭނެ ކަމަށް ރައީސް ވިދާޅުވި އެވެ.