އަންނަ ހަފްތާގައި ރިލީޒް ކުރަން ހަމަޖެހިފައިވާ ބޮލީވުޑްގެ ފިލްމު "އެމަޖެންސީ"އަކީ އެޅުނު ޅަ އެއްޗެއް ކަމަށް އެ ފިލްމުގެ އެކްޓަރު އަދި ޑިރެކްޓަރު ކަންގަނާ ރަނޯޓް ބުނެފި އެވެ.

މީޑިއާއަށް ދިން އިންޓަވިއުއެއްގައި ކަންގަނާ ވަނީ އެ ފިލްމު އުފެއްދުމުގައި ކުރިމަތިވި ގޮންޖެހުންތަކާ ބެހޭ ގޮތުން ވާހަކަ ދައްކާފަ އެވެ. އެގޮތުން އެންމެ ފުރަތަމަ ގޯސްކޮށް ކުރެވުނު ކަމަކީ އެ ފިލްމު އަމިއްލައަށް ޑައިރެކްޓް ކުރުން ކަމަށް ކަންގަނާ ބުންޏެވެ. އެގޮތުން އެކަމުގައި ފަރުވާކުޑަ ކުރެވުނު ކަމަށް އޭނާ އެއްބަސްވި އެވެ.

އޭގެ އިތުރުން ދެން އޭނާ ނިންމި ގޯސް ނިންމުމަކީ އެ ފިލްމު ތިއޭޓަރުތަކުގައި އެޅުވުން ކަމަށް ވެސް ކަންގަނާ ބުނެފައިވެ އެވެ. ސިނަމާތަކުގައި އެޅުވުމުގެ ބަދަލުގައި އޮންލައިންކޮށް ރިލީޒް ކުރަން އުޅުނުނަމަ ފިލްމަށް އެހާ ގިނަ ގޮންޖެހުންތައް ކުރިމަތި ނުވީސް ކަމަށް އޭނާ ބުންޏެވެ.

އެ ފިލްމު އެންމެ ފުރަތަމަ ރިލީޒް ކުރަން ހަމަޖެހިފައި އޮތީ މިދިޔަ އަހަރު ނަމަވެސް އިންޑިއާގެ ސެންސަރު ބޯޑުން ހުއްދަ ނުލިބުމާއެކު އެކަން ވަނީ ފަސްކުރެވިފަ އެވެ.

އެންމެ ފަހުން ފިލްމަށް ބައެއް ބަދަލުތައް ގެނައުމަށްފަހު ސިނަމާތަކުގައި ރިލީޒްކުރަން ހަމަޖެހިފައިވަނީ ޖެނުއަރީ މަހުގެ 17 ވަނަ ދުވަހު އެވެ.