ފުވައްމުލައް ސިޓީގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމުގެ ތުހުމަތު ކުރެވޭ ދެ މީހުން ހައި ކޯޓުން ދޫކޮށްލުމުން ކުރިމިނަލް ކޯޓުން އަލުން ބަންދުކޮށްފި އެވެ.

"އޮޕަރޭޝަން ވެށި ރައްކަލް"ގެ ނަމުގައި ފުލުހުން މިދިޔަ ޑިސެމްބަރު މަހުގެ ނުވަ ވަނަ ދުވަހު ފުވައްމުލަކުގައި ކުރިއަށް ގެންދިޔަ ހާއްސަ އޮޕަރޭޝަންގައި ހައްޔަރުކުރީ ފުވައްމުލައް، ދޫޑިގަން، ކަރަންކާވިލާ، އަހްމަދު ނިއުޝާދު،34، އާއި، ފުވައްމުލައް، ދޫޑިގަން، ޒަމާނީގެ، ހަސަން އާޒިމް،29، އެވެ.

އެ ދެ މީހުން ހައްޔަރުކޮށް ބަންދާ މެދު ގޮތެއް ނިންމަން އެންމެ ފުރަތަމަ ހާޒިރުކުރީ ފުވައްމުލަކު ކޯޓަށެވެ. އެ ކޯޓުން އަމުރުކުރީ ޝަރީއަތް ނިމެންދެން އެ ދެ މީހުން ބަންދުގައި ބެހެއްޓުމަށެވެ.

އެ މައްސަލަ އެ ދެ މީހުންގެ ފަރާތުން އިސްތިއުނާފުކުރުމުން އެ މައްސަލަ ބެލުމަށްފަހު ހައިކޯޓުން އިއްވި ހުކުމްގައި ވަނީ އެމީހުން ޝަރީއަތް ނިމެންދެން ބަންދުކުރަން އަމުރުކުރިއިރު ހެކި ހުރި މިންވަރު ބެލި ގޮތް ގޯސް ކަމަށެވެ. އެހެންވެ އެމީހުން ޝަރީއަތް ނިމެންދެން ބަންދުކުރަން ނިންމުމަކީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާއާ ހިލާފު ނިންމުމެއް ކަމަށް ހައިކޯޓުން ވަނީ ކަނޑައަޅާފަ އެވެ.

އެ އަމުރު ހައި ކޯޓުން ބާތިލްކޮށްފައިވަނިކޮށް ފަހުން ހައްޔަރުކޮށް އިއްޔެ ކްރިމިނަލް ކޯޓަށް ހާޒިރުކުރަނީ އެ މީހުން މާލެއަށް ގޮސް މާލެ ކައިރި ރަށަކަށް ދާން އުޅޭ ކަމުގެ މައުލޫމާތު ފުލުހުންނަށް ލިބިގެން ކަމަށް ކްރިމިނަލް ކޯޓުގެ އަމުރުގައި ބުނެފައިވެ އެވެ.

މި ދެ މީހުން ބަންދުކުރުމަށް ކްރިމިނަލް ކޯޓުން ދިނީ 10 ދުވަހެވެ. ބަންދުކުރުމަށް އާ އަމުރެއް ނެރެން ހުރަހެއް ނެތް ކަމަށް ވެސް ކްރިމިނަލް ކޯޓުގެ އަމުރުގައި ފާހަގަކޮށްފައިވެ އެވެ.

ކޯޓުގައި ފުލުހުން ބުނީ ފަސް އަހަރު ތެރޭގައި އަހްމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާ ކަމަށް ތަހުގީގަށް ފާހަގަވެފައިވާ ކަމަށެވެ. އަދި ފާއިތުވި ދެ އަހަރު ތެރޭގައި ހަސަން އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށް ވުރެ ގިނަ ރުފިޔާގެ މުއާމަލާތް ހިންގާފައިވާކަން ފާހަގަކުރެވޭ ކަމަށް ވެސް ފުލުހުން ބުންޏެވެ.

މި މައްސަލައާ ގުޅިގެން 21 މީހަކާއި ދެ ކުންފުންޏެއްގެ ބޭންކު އެކައުންޓް ކޯޓު އަމުރުގެ ދަށުން ވަނީ ހިފަހައްޓާފަ އެވެ.