އިންޑިއާ ފަދަ ދުނިޔޭގެ ބޮޑު ބާރުތައް ހިމެނޭ ދެކުނު އޭޝިއާ ސަރަހައްދުގެ އެންމެ ވަރުގަދަ ޕާސްޕޯޓުގެ ލަގަބު ޖެހިޖެހިގެން ހަވަނަ ފަހަރަށް ދިވެހި ޕާސްޕޯޓަށް ލިބިއްޖެ އެވެ.

އަހަރަކު އެއްފަހަރު ޝާއިއުކުރާ ހެންލީ ޕާސްޕޯޓް އިންޑެކްސްގައި މިއަހަރު ރާއްޖޭގެ ޕާސްޕޯޓު ހިމެނިފައިވަނީ 53 ވަނައިގަ އެވެ. އެއީ ވިސާއާ ނުލާ ދަތުރު ކުރެވޭ 94 ގައުމާއެކުގަ އެވެ.

މިއީ މިދިޔަ އަހަރާ އަޅާބަލާއިރު ހަތަރު ދަރަޖައިގެ ކުރިއެރުމެކެވެ. ފާއިތުވި އަހަރުގެ ލިސްޓުގައި ރާއްޖޭގެ ޕާސްޕޯޓު އޮތީ 57 ވަނައިގަ އެވެ.

މި ސަރަހައްދުން ރާއްޖެއާ އެންމެ ގާތްކުރާ އިންޑިއާ އޮތީ ދުނިޔޭގެ ރޭންކިންގެ 85 ވަަނައިގަ އެވެ. އެ ގައުމުގެ ޕާސްޕޯޓުގައި ވިސާ ނެތި ދަތުރު ކުރެވެނީ 57 ގައުމަކަށެވެ.

ގްލޯބަލް ޕާސްޕޯޓް އިންޑެކްސްގެ އެންމެ ކުރީގައި މިއަހަރު އޮތީ ވިސާނެތި ދަތުރު ކުރެވޭ 195 ގައުމާއެކު ސިންގަޕޫރުގެ ޕާސްޕޯޓެވެ. ދެވަނައިގައި އޮތީ މިދިޔަ އަހަރާ ހަމައަށް އެއްވަނައިގައި އޮތް ޖަޕާނެވެ.

ސަރަހައްދީ ގޮތުން ގްލޯބަލް ޕާސްޕޯޓް އިންޑެކްސްގެ އެންމެ ކުރީގައި ރާއްޖެ އޮތުމުގެ ފަހަތުގައި ވަނީ ރާއްޖެއާއި އެހެން ގައުމުތަކާ އޮންނަ ގުޅުން ވަރުގަދަވެ ދަތުރު ފަތުރު ކުރުމުގައި ލިބެމުންދާ ލުއި ފަސޭހަތަކެވެ.