ބޮލީވުޑްގެ ކާމިޔާބު ފިލްމު "ކަހޯނާ ޕިޔާރު ހޭ" ރިލީޒްކުރި ފަހުން ލެއިން ލިޔެފައިވާ ސިޓީތައް ލިބުނު ކަމަށް އެ ފިލްމުގެ ލީޑު އަންހެން ތަރި އަމީޝާ ޕަޓޭލް ބުނެފި އެވެ.

އެ ފިލްމު ރިލީޒް ކުރިތާ 25 އަހަރު ފުރުން ފާހަގަ ކުރުމުގެ ގޮތުން އިންޑިއާގެ މީޑިއާއަކަށް ދިން އިންޓަވިއުއެއްގައި އަމީޝާ ވަނީ އެ ފިލްމުގެ ސަބަބުން އޭނާގެ ދިރިއުޅުމަށް އައި ބަދަލުތަކާ ބެހޭގޮތުން ވާހަކަ ދައްކާފަ އެވެ.

އޭނާ ބުނީ އެ ފިލްމަކީ އޭނާގެ ހަޔާތުގެ ފެށުން ކަމުގައި ގަބޫލުކުރާ ކަމަށާއި ފިލްމުގެ ސަބަބުން އޭނާއަށް ބެލުންތެރިންގެ ފަރާތުން ލިބުނު ލޯތްބާއެކު ބައެއް ނުތަނަވަސް ކަންކަން ވެސް ދިމާވެފައިވާ ކަމަށެވެ.

އެގޮތުން އެ ފިލްމަށްފަހު އޭނާއަށް ލެއިން ލިޔެފައިވާ ލޯބީގެ ސިޓީތައް ލިބުނު ކަމަށާއި ބައެއް މީހުން އޭނާގެ ފަހަތުން ފާރަލަމުން ހިނގި ކަމަށް ވެސް އަމީޝާ ބުންޏެވެ.

ރިތިކް ރޯޝަންއާއެކު އަމީޝާ ފެނިގެންދިޔަ އެ ފިލްމަކީ އެ ދެމީހުންގެ ވެސް އެންމެ ފުރަތަމަ ފިލްމު ނަމަވެސް އެ ފިލްމާއެކު އެ ދެމީހުންނަށް ފިލްމު ބަލާ މީހުންގެ ލޯތްބާއި މަގުބޫލުކަން ލިބިގެންދިޔަ އެވެ.

"ކަހޯނާ ޕިޔާރު ހޭ " ރިލީޒް ކުރިތާ 25 އަހަރު ވެފައިވާއިރު އެ ފިލްމު ވަނީ އަލުން ސިނަމާތަކުގައި ރިލީޒް ކުރަން ތައްޔާރުވެފަ އެވެ.