ފަލަސްތީނަށް އިޒްރޭލުން ދެމުންދާ ހަމަލާތައް ހުއްޓާލުމުގެ އެއްބަސްވުމަށް މި މަހުގެ 19 އިން ފެށިގެން އަމަލުކުރަން ފެށުމަށް ނިންމުމާއި ގުޅިގެން އުފާފާޅުކުރަން ފަށައިފި އެވެ.

މި އެއްބަސްވުމުގެ ދަށުން 15 މަސްދުވަހުގެ މުއްދަތަށް ދެމިގެންދިޔަ، ފަލަސްތީނުގެ ޣައްޒާ ސަރަހައްދު ސުންނާފަތިކޮށް މެދުއިރުމަތީގެ ސަރަހައްދު ހަމަނުޖެހުމުގެ ތެރެއަށް ވައްޓާލި ހަނގުރާމަ ނިމުމަކަށް ގެނެސް ހަމާސްއިން ހިފަހައްޓާފައިވާ ރަހީނުން ދޫކޮށްލުމަށް ވަނީ ނިންމާފަ އެވެ.

ގިނަ މަރުހަލާތަކުގެ މައްޗަށް އެކުލެވޭ އެއްބަސްވުމުގައި، ފުރަތަމަ 6 ހަފްތާގެ މުއްދަތަކަށް ހަނގުރާމަ ހުއްޓާލުމާއި، ޣައްޒާ ސަރަހައްދުން އިޒްރޭލުގެ ސިފައިން ފޭބުން ހިމެނެ އެވެ. ޣައްޒާ ކޮންޓްރޯލްކުރާ ހަމާސް ޖަމާޢަތުން ހިފަހައްޓާފައިވާ ރަހީނުން ދޫކޮށްލުމުގެ ބަދަލުގައި، އިޒްރޭލުން ބަންދުކޮށްފައިވާ ފަލަސްތީނު ޤައިދީން ދޫކޮށްލެވޭނެ އެވެ.

ދޯހާގައި ބޭއްވުނު ނޫސްވެރިންގެ ބައްދަލުވުމެއްގައި، ޤަތަރުގެ ބޮޑުވަޒީރު ޝެއިޚް މުހައްމަދު ބިން އަބްދުއްރަހްމާން އަލް ތާނީ ވިދާޅުވީ، ހަނގުރާމަ ހުއްޓާލުން ޖެނުއަރީ 19 ވަނަ ދުވަހުން ފެށިގެން އަމަލުކުރާގޮތަށް ހަމަޖެހިފައިވާ ކަމަށެވެ. މި އެއްބަސްވުން ތަންފީޒުކުރުމަށްޓަކައި އިޒްރޭލާއި ހަމާސްއާއެކު މަޝްވަރާކުރަމުންދާ ކަމަށް އެމަނިކުފާނު ވިދާޅުވި އެވެ.

މި އެއްބަސްވުމަށް ވާސިލުވެވުނު ނަމަވެސް، ޖެނުއަރީ 15 ވަނަ ދުވަހުގެ ރޭ ޣައްޒާގައި އިޒްރޭލުގެ ވައިގެ ހަމަލާތައް ކުރިއަށްދިޔަކަމަށް އެ ސަރަހައްދުގެ ރައްޔިތުން ބުނެފައިވެ އެވެ. މި ހަނގުރާމައިގައި މިހާތަނަށް 46،000 އަށްވުރެ ގިނަ މީހުން މަރުވެފައިވާކަމަށް އެ ސަރަހައްދުގެ ސިއްހީ އިދާރާތަކުން ބުނެ އެވެ.

މަޝްވަރާތަކާ ގާތުން ގުޅިފައިވާ ފަލަސްތީނުގެ އޮފިޝަލެއް ބުނެފައިވަނީ، ޖެނުއަރީ 19 ވަނަ ދުވަހު ހަނގުރާމަ ހުއްޓާލުމުގެ ކުރިން ދެފަރާތުންވެސް ހަމަލާތައް ހުއްޓާލުމަށް މެދުވެރިން މަސައްކަތްކުރަމުންދާ ކަމަށެވެ.

މި އެއްބަސްވުމުގެ ޚަބަރު ލިބުމާއެކު، ކާބޯތަކެއްޗާއި، ފެނާއި، ހިޔާވަހިކަމާއި ތެލުގެ ބޮޑު ދަތިކަމެއް ކުރިމަތިވެފައިވާ ޣައްޒާގެ މަގުތަކުގައި ފަލަސްތީނުގެ ރައްޔިތުން ދަނީ އުފާ ފާޅުކުރަމުންނެވެ. ޚާން ޔޫނިސްގައި ގިނަ ބަޔަކު މަގުމައްޗަށް ނުކުމެ، އުފާފާޅުކޮށް، ފަލަސްތީނުގެ ދިދަ ނަގައި، ނަށައި އުފާފާޅު ކޮށްފައިވެ އެވެ.

އިޒްރޭލުން މި އެއްބަސްވުން ރަސްމީކޮށް ޤަބޫލުކުރާނީ އެ ޤައުމުގެ ސެކިއުރިޓީ ކެބިނެޓާއި ސަރުކާރުން ފާސްކުރުމުންކަމަށާއި، މިކަމަށް ޖެނުއަރީ 16 ވަނަ ދުވަހު ވޯޓުލުމަށް ހަމަޖެހިފައިވާކަމަށް އޒްރޭލު އޮފިޝަލެއް ބުނެފައިވެ އެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އިއްތިހާދު ސަރުކާރުގެ ބައެއް ހަރުކަށި މެންބަރުން މި އެއްބަސްވުމާ ދެކޮޅު ހަދާފައިވީނަމަވެސް، މި އެއްބަސްވުން ފާސްވާނެކަމަށް ބެލެވެ އެވެ. އިސްރާއީލުގެ މާލީ ވަޒީރު ބެޒަލެލް ސްމޮޓްރިޗް ވަނީ ޖެނުއަރީ 15 ވަނަ ދުވަހުވެސް މި އެއްބަސްވުމާ ދެކޮޅަށް ވާހަކަދައްކާފަ އެވެ.

ހަމާސްއިން ސޯޝަލް މީޑިއާގައި ހަނގުރާމަ ހުއްޓާލުމާ ގުޅޭގޮތުން ނެރުނު ބަޔާނުގައި މި އެއްބަސްވުމަކީ ފަލަސްތީނު މީހުންނަށް ލިބުނު ކާމިޔާބެއް ކަމަށާއި އަދި ރަނގަޅު ބަދަލެއް ކަމަށް ބުނެފައިވެ އެވެ.

މި ހަނގުރާމަ ހުއްޓާލުމުގެ އެއްބަސްވުން ކާމިޔާބުވެއްޖެނަމަ، ޣައްޒާގެ ބޮޑު ބައެއް ފަނާކޮށްލައި، އެ ސަރަހައްދުގެ ހަނގުރާމައިގެ ކުރީގެ އާބާދީ ކަމުގައިވާ 2.3 މިލިއަން މީހުންގެ ތެރެއިން ގިނަ ބަޔަކު ގޭގެއިން ނުކުމެ އުޅެންޖެހިފައިވާ ހަނގުރާމަ ހުއްޓިގެންދާނެ އެވެ.

މިކަމުގެ ސަބަބުން މުޅި މެދުއިރުމަތީގެ ސަރަހައްދުގައި އުފެދިފައިވާ ހަމަނުޖެހުންތައް މަޑުޖެހިގެންދާނެ އެވެ. އިޒްރޭލުން ހޮފާފައިވާ ވެސްޓް ބޭންކާއި، ލުބުނާނާއި، ސީރިއާ، ޔަމަން އަދި އިރާޤުގައި އުފެދިފައިވާ ހަނގުރާމައިގެ ހާލަތު ނިމުމަކަށް އަންނާނެ އެވެ. އަދި ސަރަހައްދުގެ ދެ ވާދަވެރި ޤައުމުކަމުގައިވާ އިޒްރޭލާއި އީރާނާ ދެމެދު ފުޅާ ދާއިރާއެއްގައި ހަނގުރާމައެއް ހިނގައިދާނެކަމުގެ ބިރުވެރިކަން ކުޑަވެގެންދާނެ އެވެ.