ބޮލީވުޑްގެ އަރަމުން އަންނަ ޒުވާން ތަރި ކާތިކް އާރްޔަން އުޅެނީ ލޯބީގެ ގޮތުން މީހަކާ ގުޅިގެން ނޫން ކަމަށާއި މިވަގުތު ހުރީ ހުސްކޮށް ކަމަށް އޭނާ ބުނެފި އެވެ.

ދާދި ފަހުން އިންޑިއާގެ މީޑިއާއަކަށް ދިން އިންޓަވިއުއެއްގައި ކާތިކް ވަނީ އޭނާގެ ލޯބީގެ ހަޔާތާ ބެހޭގޮތުން އާއްމުންނަށް މައުލޫމާތު ދީފަ އެވެ.

އެވޯޑް ޝޯއެއްގެ ތެރެއިން ކާތިކް ބުނީ މިވަގުތު އޭނާގެ ހަޔާތުގައި ލޯބީގެ އެއްވެސް ކަމެއް ނުވާ ކަމަށާއި އެކަމުގެ ޔަގީންކަން ދޭ ކަމަށެވެ. އަދި އޭނާގެ ހުރިހާ ވަގުތެއް ހޭދަވަނީ ފިލްމީ މަސައްކަތްތަކަށް ކަމަށާއި އެހެން ކަމުން އިތުރު ކަމަކަށް ވަގުތު ނުވާ ކަަމަށް ވެސް ކާތިކް ބުނެފައިވެ އެވެ.

ކާތިކްއަކީ ބޮލީވުޑްގައި މިވަގުތު ހުރި އެންމެ ކުޅަދާނަ އެއް އެކްޓަރަށް ވާއިރު އޭނާގެ ލޯބީގެ ހަޔާތާ ބެހޭގޮތުން މީޑިއާގައި ވަރަށް ގިނައިން ވާހަކަ ދެކެވެ އެވެ.

އެކަމަކު އޭނާއާއެކު މަސައްކަތް ކޮށްފައިވާ ބައެއް އަންހެން ތަރިންނާ ލޯބީގެ ގޮތުން ގުޅިގެން އުޅޭ ކަމަށް ހަބަރުތައް ފެތުރުނު ނަމަވެސް އެއިން އެއްވެސް ހަބަރެއް އޭނާ ޔަގީން ކޮށްދީފައެއް ނުވެ އެވެ.

ފިލްމީ މަސައްކަތްތަކަށް ބަލާލާއިރު ކާތިކް އެންމެ ފަހުން ފެނިގެންދިޔައީ "ބޫލް ބުލައްޔާ 3"އިންނެވެ. އޭނާގެ ކުރިއަށް އޮތް ފިލްމަކީ "އާޝިގީ 3"އެވެ.