ބޮލީވުޑްއާއި ހޮލީވުޑްގައި ވެސް ގިނަ ބައެއްގެ މަގުބޫލުކަން ހޯދާފައިވާ ތަރި ޕްރިޔަންކާ ޗޯޕްރާ ބޮލީވުޑަށް އެނބުރި އަންނަން އުޅޭ ކަމުގެ ފެހި ސިގްނަލް ދީފި އެވެ.

ހަބަރުތައް ބުނާ ގޮތުގައި މަހޭޝް ބާބޫ ލީޑު ރޯލުން ފެނިގެންދާ ފިލްމެއް ކަމަށްވާ "އެސްއެސްއެމްބީ 29"އަށް ޕްރިޔަންކާ ވަނީ އާނބަސް ބުނެފަ އެވެ.

މި އަޑުތައް ފެތުރިފައި މިވަނީ ދާދި ފަހުން ޕްރިޔަންކާ ޓޮރޮންޓޯއިން އިންޑިއާގެ ހައިދަރްއާބާދަށް ދަތުރު ކޮށްފައި ވަނިކޮށެވެ. ބުނެވޭ ގޮތުގައި އޭނާ އިންޑިއާއަށް އައީ އެ ފިލްމުގެ މަޝްވަރާ ތަކަށެވެ.

މިއީ ލަވަކިޔުންތެރިޔާ ނިކް ޖޯނަސްއާ ކައިވެނިކޮށް އެމެރިކާއަށް ދިރިއުޅުން ބަދަލު ކުރުމަށްފަހު ޕްރިޔަންކާ ބޮލީވުޑްގެ ފިލްމަކުން ފެންނާނެ ފުރަތަމަ ފަހަރު ކަމަށް ބެލެވެ އެވެ.

މީގެކުރިން ވެސް ޕްރިޔަންކާއަށް ބޮލީވުޑްގެގިނަ ފިލްމުތަކެއް ހުށައެޅުނު ނަމަވެސް އެއިން އެއްވެސް ފިލްމެއް ކުރިއަށް ގޮސްފައެއް ނުވެ އެވެ. އޭގެ ތެރޭގައި ކެޓްރީނާއާއި އާލިއާއާއެކު އޭނާ ފެނިގެންދާނެ ކަމަށް ބެލެވުނު "ޖީލޭ ޒަރާ" ވެސް ހިމެނެ އެވެ.

2000ގެ އަހަރުތަކުގައި ބޮލީވުޑްގެ ގިނަ ފިލްމުތަކުން ފެނިގެންދިޔަ ޕްރިޔަންކާ މިހާރު މައިގަނޑު ގޮތެއްގައި ހަރަކާތްތެރިވަނީ ހޮލީވުޑްގަ އެވެ.