ހޮލީވުޑްގެ މަޝްހޫރު ތަރި ބްރެޑް ޕިޓްގެ ނަމުގައި ފައިސާގެ އޮޅުވާލުމެއް ހިންގައި އަންހެނެއްގެ އަތުން މިލިއަނެއްހާ ޑޮލަރު އަތުލައިފި އެވެ.

ދާދި ފަހުން އެމެރިކާގެ ޓީވީ ޝޯއަކަށް ދިން އިންޓަވިއުއެއްގައި އޭން ނަމަކަށް ކިޔާ އެމީހާ ވަނީ ބްރެޑް ޕިޓްއަށް ވެގެން އޭނާއަށް މަކަރު ހެދި މީހެއްގެ ވާހަކަ ކިޔައިދީފަ އެވެ.

އޭން ބުނީ 2023 ވަނަ އަހަރު ބްރެޑްގެ މަންމަ ކަމަށް ދައުވާކުރި މީހަކު ސޯޝަލް މީޑިއާ މެދުވެރިކޮށް އޭނާއަށް މެސެޖު ކުރި ކަމަށާއި ބްރެޑްއާ ވާހަކަ ދެއްކޭނެ ގޮތް ހަމަޖައްސައިދިނީ އޭނާ ކަމަށެވެ.

"އެންމެ ފުރަތަމަ އަހަންނަށް ވެސް ހީވި އެއީ ފޭކްއެކޭ. އެކަމަކު އަހަންނަކީ ސޯޝަލް މީޑިއާއަށް އެހާ ފަރިތަ މީހެއް ނޫން. އެހެންވެ ލަނޑު ދެވުނީ،" އޭން ބުންޏެވެ.

އޭން އިތުރަށް ބުނެފައިވަނީ ބްރެޑްއަށް ހެދިގެން އެ މީހަކު އޭނާއަށް އަހަރެއްހާ ދުވަސް ވަންދެން ވާހަކަ ދެއްކި ކަމަށާއި އެ ދުވަސްވަރަކީ އޭނާގެ ކައިވެނި ވެސް ރޫޅުނު ދުވަސްވަރު ކަމަށެވެ.

އެ ދުވަސްވަރު ބްރެޑްގެ ކުރީގެ އަންހެނުން އެންޖެލީނާ ޖޯލީ ބްރެޑްގެ ބޭންކް އެކައުންޓްތައް ފްރީޒް ކޮށްފައިވުމާއެކު ބްރެޑް ކިޑްނީ ކެންސަރަށް ފަރުވާ ހޯދަން ފައިސާ ބޭނުންވެގެން ބުނުމުން 850،000 އެމެރިކާ ޑޮލަރު ދިން ކަމަށް ވެސް އޭން ބުންޏެވެ.

އޭންގެ މި އިންޓަވިއުއާއެކު ބްރެޑް ޕިޓްގެ ޓީމުން ވަނީ ބަޔާނެއް ނެރެފަ އެވެ. އެ ބަޔާނުގައި އެ ޓީމުން ވަނީ ބްރެޑްއާއި އޭނާގެ ސަޕޯޓަރުންނާ ދެމެދު އޮތް ވަރުގަދަ ގުޅުމުގެ ނާޖާއިޒު ފައިދާ ބަޔަކު ނަގާތީ ހިތާމަކުރާ ކަމަށް ބުނެފަ އެވެ.