މި ސަރުކާރުން އަލަށް އުފެއްދި މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާގައި 43 ސިޔާސީ މުވައްޒަފުން ތިބި އިރު، މުސާރައަށް މަހަކު 1.14 މިލިއަން ރުފިޔާ ހަރަދު ކުރާކަން ހާމަވެއްޖެ އެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން އެ މިނިސްޓްރީގެ ސިޔާސީ މަގާމުތަކުގައި ތިބި މީހުންގެ އަދަދާއި މުސާރަ ހޯދުމަށް އެދި "ހުރިހާ" އިން ހުށަހެޅި އާރްޓީއައިއަށް ދީފައިވާ ޖަވާބުން އެނގޭ ގޮތުގައި، އެ މިނިސްޓްރީގައި 43 ސިޔާސީ މުވައްޒަފުން ތިބޭއިރު، މުސާރައަށް މަހަކު 1.143،000ރ ހޭދަ ކުރެ އެވެ.

އޭގެ ތެރޭގައި 3 ސްޓޭޓް މިނިސްޓަރުން، 9 ޑެޕިއުޓީ މިނިސްޓަރުން، 19 ސީނިއާ ޕޮލިޓިކަލް ޑިރެކްޓަރުން، އަދި 12 ޕޮލިޓިކަލް ޑިރެކްޓަރުން ތިބޭ ކަމަށް އެ މިނިސްޓްރީން ހިއްސާކުރި މައުލޫމާތުގައިވެ އެވެ.

މި ސަރުކާރުގައި ސިޔާސީ މަގާމުތަކުގެ ޖުމްލަ އަދަދު ވަނީ ސިއްރުކޮށްފަ އެވެ. ސިޔާސީ މަގާމުތަކުގެ އަދަދު 2000 އިން މަތިވާނެ ކަމަށް އިދިކޮޅު އެމްޑީޕީން ބުނަމުން ދަނިކޮށް ރައީސް މުހައްމަދު މުއިއްޒު ވަނީ ސިޔާސީ މަގާމު މަދުކުރައްވަން ނިންމެވިކަން މިދިޔަ ޖޫން މަހު އިއުލާން ކުރައްވާފަ އެވެ.

އެގޮތުން އޮކްޓޯބަރު 31 އާ ހަމައަށް 228 ސިޔާސީ މުވައްޒަފުން ވަކި ކުރިކަމަށް ސަރުކާރުގެ ތަރުޖަމާނު ހީނާ ވަލީދު ވިދާޅުވި އެވެ. ނަމަވެސް އޭގެ ފަހުން ސިޔާސީ މަގާމު ދިނީ ކިތައް މީހުންނަށް ކަމެއް ނޭނގެ އެވެ. ސަރުކާރުން އަދިވެސް ގެންދަނީ ސިޔާސީ މަގާމުތަކަށް މީހުން އައްޔަން ކުރަމުންނެވެ.