މިނިވަންކުރާ ރަހީނުންގެ ނަންތައް ނުލިބޭކަމަށް ބުނެ އިޒްރޭލުން ޣައްޒާއަށް ދެމުންދާ ހަމަލާތައް ހުއްޓާލުމުގެ އެއްބަސްވުމަށް އަމަލު ކުރުން ފަސްކޮށްފައިވަނިކޮށް ރަހީނުންގެ ނަންތައް ލިބިފައިވާކަމަށް އިޒްރޭލު ސިފައިން ބުނެފި އެވެ.

މިއަދު ފަލަސްތީނު ގަޑިން 8:30 ގައި ހަނގުރާމަ ހުއްޓާލުމުގެ އެއްބަސްވުމަށް އަމަލުކުރަން ނިންމާފައިވަނިކޮށް، މިނިވަން ކުރާ ރަހީނުންގެ ނަންތައް ނުލިބޭކަމަށްބުނެ އިޒްރޭލުން ވަނީ އެއްބަސްވުމަށް އަމަލުކުރުން ލަސްކޮށްފަ އެވެ.

މިއާއެކު ޣައްޒާއަށް އިޒްރޭލުން ހަމަލާތައް ދޭންފަށާފައިވާ އިރު، ހަމަލާތަކުގައި މިހާތަނަށް 10 މީހަކު ޝަހީދުވެފައިވާ ކަަމަށް ރިޕޯޓްތައް ބުނެ އެވެ. މިއަދުގެ ހަމަލާތަކުގައި 25 މީހުން ޒަހަމްވެފައިވެ އެވެ.

ހަމާސް އިން ބުނެފައިވަނީ މިނިވަން ކުރާ މީހުންގެ ނަންތައް ދިނުން ލަސްވީ ދިމާވި ޓެކްނިކަލް މައްސަލައަކާ ގުޅިގެން ކަމަށެވެ. އަދި އޭގެފަހުން އިޒްރޭލުގެ ހަމަލާތަކުގެ ސަބަބުން ލަސްވީކަމަށް ހަމާސްއިން ބުންޏެވެ.

އިޒްރޭލުން މި އެއްބަސްވުމާއި ދެކޮޅު ހެދި ބައެއް މިނިސްޓަރުންގެ ތެރެއިން އެ ގައުމުގެ ނެޝަނަލް ސެކިއުރިޓީ މިނިސްޓަރު އިތަމާރު ބެން-ގްވީރު ދާދި ދެންމެ އިސްތިއުފާ ހުށަހަޅާފައިވާ ކަމަށް އިޒްރޭލުގެ މީޑިއާތަކުން ވަނީ ރިޕޯޓުކޮށްފަ އެވެ.

ނަތަންޔާހޫ ރޭގެ ވަގުތެއްގައި ބުނެފައިވަނީ މި އެއްބަސްވުމުގެ ދަށުން ހަނގުރާމަ ހުއްޓާލަނީ މީ ވަގުތީ ހުއްޓާލުމެއް ކަމަށާއި އިޒްރޭލުން ބޭނުންވެއްޖެ ނަމަ ހަނގުރާމަ އަލުން ފަށާނެކަމަށެވެ.