އެންޓި ކޮރަޕްޝަން ކޮމިޝަން (އޭސީސީ) އަށް އައްޔަން ކުރައްވަން ރައީސް މުހައްމަދު މުއިއްޒު މަޖިލީހަށް ފޮނުއްވި ނަންތަކުން އިސްކަންދެއްވާ ތަރުތީބު ބަދަލުކުރައްވާ އަލުން ފޮނުއްވައިފި އެވެ.

މިދިޔަ ބުރާސްފަތި ދުވަހު ރައްޔިތުންގެ މަޖިލީހުން ބޭއްވި ދައުރުން ބޭރުގެ ފުރަތަމަ ޖަލްސާގައި ވަނީ ރައީސް އޭސީސީއަށް އައްޔަން ކުރެއްވުމަށް އިސްކަންދެއްވާ ނަންތައް ފޮނުއްވާފަ އެވެ. ރައީސް ކުރިން އިސްކަންދެއްވި ނަންތަކުގެ ތެރޭގައި ހިމެނެނީ އަހުމަދު ނާޝިދު، މއ. ގޯލްޑަން މޫން އާއި އާސިޔާ އަޒީމާ، ރޯޒްވިލާ/ރ. ހުޅުދުއްފާރެވެ.

ނަމަވެސް މިއަދު މަޖިލީހުން ބާއްވާ ދައުރުން ބޭރު ދެވަނަ ޖަލްސާގައި އިއްވި ސިޓީގައި ވަނީ ކުރިން ރައީސް އިސްކަންދެއްވި އެއް ނަމަށް ބަދަލު ގެންނަވާފަ އެވެ.

އެގޮތުން މިއަދު ފޮނުއްވީ އަހުމަދު ނާޝިދު ގެ ނަމުގެ އިތުރުން އާސިޔާގެ ބަދަލުގައި އަބްދުﷲ ނާޝިދު، ފަސާނާ/ރ. އަލިފުށި އެވެ.

އޭސީސީގެ ދެ ގޮނޑި ހުސްވީ ކޮމިޝަންގެ ނައިބު ރައީސް އަބްދުއްސަލާމާއި މެމްބަރު ތޯހާ މުހައްމަދު މިދިޔަ ނޮވެމްބަރު މަހު އިސްތިއުފާ ދެއްވުމުންނެވެ. އެ ދެ މެންބަރުން އިސްތިއުފާ ދެއްވީ އެ ދެ މެންބަރުންގެ އިތުބާރު ނެތް ކަމަށް ވޯޓު ނަގަން މަޖިލީހުން ތައްޔާރުވެފައި ވަނިކޮށެވެ.

އޭސީސީއަށް މީހުން އައްޔަންކުރުމުގެ މަސައްކަތް ކުރިއަށް ގެންދާނީ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީންނެވެ.