ހޮލީވުޑްގެ މަޝްހޫރު އެކްޓަރު ބްރޭޑްލީ ކޫޕާއާއި ގިނަ ބައެއްގެ ސަމާލުކަން ހޯދާފައިވާ މޮޑެލް ގިގީ ހަދީދް ލޯބީގެ ގޮތުން ގުޅިގެން އުޅޭކަމަށް އަޑު ފެތުރޭތާ ދުވަސްތަކެއް ވެއްޖެ އެވެ.

އެމީހުން ލޯބީގެ ގޮތުން ގުޅިގެން އުޅޭކަމަށް 2023 ވަނަ އަހަރުން ފެށިގެން އަޑު ފެތުރެމުން އައި ނަމަވެސް އެ ދެމީހުންކުރެ އެކަކުވެސް އެކަން ޔަގީންކޮށްދީފައެއް ނުވެ އެވެ.

އެންމެ ފަހުގެ ހަބަރުތައް ބުނާ ގޮތުގައި އެ ދެމީހުން އަދިވެސް އުޅެނީ ލޯބީގެ ގޮތުން ގުޅިގެންނެވެ. އެހެން ނަމަވެސް އެމީހުންގެ ގުޅުން ކުރިއަށް ގެންދަން އަވަަސް އަރުވާލައިގެން ނޫޅޭ ކަމަށް ވެސް އެ ހަބަރުތައް ބުނެ އެވެ.

އެގޮތުން އެ ދެމީހުން ވެސް މިވަގުތު އެންގޭޖްވެ ކައިވެނި ކުރުމުގެ ބަދަލުގައި ސަމާލުކަން ދެނީ އަމިއްލަ ކެރިއަރަށް ކަމަށް ރިޕޯޓުތައް ބުނެ އެވެ.

ބްރޭޑްލީއާއި ގިގީ ލޯބީގެ ގޮތުން ގުޅިގެން އުޅުނު ނަމަވެސް ހޮލީވުޑްގެ އެހެން ޖޯޑުތަކާ ހިލާފަށް އެ ދެމީހުން އެކުގައި ބޭރުތެރެއިން ނުފެނެ އެވެ.

ބްރޭޑްލީއަށް ކުރިން ކައިވެންޏެއް ކޮށް ދަރިއަކު ލިބިފައިވާއިރު ގިގީ ވެސް ވަނީ އޭނާގެ ކުރީގެ ބައިވެރިޔާ ޒޭން މަލިކްއާއެކު ދަރިއަކު ހޯދާފަ އެވެ.