އޮޑިދޯނިފަހަރު ބަނުމަށް ރަހުނަކާ ނުލައި ލުއި ލޯނު ލިބޭނެ ގޮތް ހަމަޖައްސައިދޭން ރައީސް ޑރ. މުހައްމަދު މުއިއްޒު ވައުދުވެއްޖެއެވެ.

ރ. އިންނަމާދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވަނީ، ރާއްޖޭގެ އެކި ކަންކޮޅުތަކުގައި، ބޯޓު ބިލްޑިންގް ސިނާއަތުގައި މަސައްކަތްކުރައްވާ ދިވެހި ހުރިހާ ރައްޔިތުންނަށް އުންމީދު އައުކޮށްދެނިވި އުފާވެރި ހަބަރުތަކެއް ދެއްވާފަ އެވެ.

އެގޮތުން، ބޯޓު ބިލްޑިންގް ދާއިރާއިން ކުރިއަށް ދިއުމަށް ބޭނުންވެފައި ތިބި ދިވެހިންނަށް ކުރިމަތިވެފައި އޮތް އެންމެ ބޮޑު ގޮންޖެހުމަކީ މާލީ ދަތިކަން ކަމުގައި ފާހަގަކުރައްވައި، ރައީސް ވަނީ، ލުއި ގޮތެއްގައި، ރަހުނަކާ ނުލައި، ބޭންކިންގް ނިޒާމުގެ ތެރެއިން ލޯނު ނެގޭނެ އިންތިޒާމު ހަމަޖައްސަވައިދެއްވާނެ ކަމަށް ވިދާޅުވެފަ އެވެ. މިއާއެކު، އިންޑަސްޓްރީ ފުޅާ ކުރުމަށް ފުރުސަތު ލިބިގެންދާނެކަން އެމަނިކުފާނު ފާހަގަކުރެއްވި އެވެ.

ރައީސް ވަނީ މި ދާއިރާއިން ދިވެހި މަސައްކަތްތެރިން ބިނާކުރުމަށްޓަކައި އިންނަމާދޫގައި ތަމްރީނުދޭ ހާއްސަ މަރުކަޒެއް ތަރައްގީ ކުރައްވަން ގަސްތުކުރައްވާކަން ހާމަކުރައްވާފަ އެވެ. މި ފުރުސަތު ފަހިކޮށްދެވިގެން ދިއުމާއެކު، ބޯޓު ބިލްޑިންގް ސިނާޢަތަކީ ދިވެހީންނަށް ހާއްސަ، އަދި ހަމަ އެކަނި ދިވެހި މަސައްކަތްތެރިން ހަރަކާތްތެރިވާ ދާއިރާއަކަށްވާނެ ކަމަށް ވިދާޅުވި އެވެ.

"މި ރަށުގައި، މި ފަންނު، މި މަސައްކަތުގެ ދާއިރާގައި ކުރިއަށްދާން ބޭނުންވާ ޒުވާނުންނަށް ތަމްރީން ލިބޭނެ ގޮތް ހަމަޖައްސައިދެވޭނެ ގޮތް ފަހިކޮށްދޭނަން. ފަހިކޮށްދެވި، މިއީ ދިވެހިންނަށް ހާއްސަ، ދިވެހިން އެކަނި މަސައްކަތް ކުރާ ދާއިރާއެއްގެ ގޮތުގައި ތަމްރީންވެގެން އަންނަ ދިވެހިން އިތުރުވެގެންދާ ދާއިރާއަކަށް ވާތަން ދެކެން ބޭނުން. އެކަމަށް ސަރުކާރުން ކޮށްދޭން ޖެހޭ ހުރިހާ ކަމެއް ކޮށްދޭނެ ކަމަށް ދަންނަވަން." ރައީސް ވިދާޅުވި އެވެ.