ހޮލީވުޑްގެ ދެތަރިން ކަމަށްވާ ޖަސްޓިން ބެލްޑޯނީއާއި ބްލޭކް ލައިވްލީގެ މެދުގައި މިހާރު ހިނގަމުންދާ ކޯޅުމުގެ ތެރެއިން ބްލޭކް ޖަސްޓިންއަށް ކޮށްފައިވަނީ ދޮގު ތުހުމަތުތަކެއްކަން ސާބިތު ކޮށްދޭން ކަމަށް ބުނެ ޖަސްޓިން ވީޑިއޯތަކެއް ލީކު ކޮށްލައިފި އެވެ.

އެ ދެމީހުން އެކުގައި ފެނިގެންދިޔަ ފިލްމު "އިޓް އެންޑްސް ވިތު އަސް"ގެ ސެޓުން ނަގާފައިވާ އެ ވީޑިއޯއިން ބްލޭކް ޖަސްޓިންއަށް ކޮށްފައިވާ ޖިންސީ ފުރައްސާރައިގެ ތުހުމަތަކީ ދޮގެއްކަން ސާބިތުވާ ކަމަށް ޖަސްޓިންގެ ގާނޫނީ ޓީމުން ބުނެ އެވެ.

އެ ވީޑިއޯގައި ފެންނަނީ ފިލްމުގެ މަންޒަރެއްގައި ޖަސްޓިންއާއި ބްލޭކް އެކުގައި ނަށަނިކޮށެވެ. ބަލާ ބެލުމަށް އެ ވީޑިއޯއިން އެއްވެސް ކަމެއް ފާހަގައެއް ނުވެ އެވެ.

ޖަސްޓިން ލީކުކުރި ވީޑިއޯތަކަށް ރައްދު ދެމުން ބްލޭކްގެ ގާނޫނީ ޓީމުން ބުނީ އެ ވީޑިއޯއިން ބްލޭކްގެ ތުހުމަތުތަކަށް އިތުރު ބާރެއް ލިބިފައިވާ ކަމަށެވެ. އެގޮތުން އެ ވީިޑިއޯގައި ޖަސްޓިން ބްލޭކްއާ ގައިގޯޅިވާން މަސައްކަތްކުރާ މަންޒަރު ފެންނަ ކަމަށާއި އެކަމުން ޖިންސީ ފުރައްސާރައިގެ ތުހުމަތުތަކަށް ބާރު ލިބޭ ކަމަށް ބްލޭކްގެ ޓީމުން ބުނެ އެވެ.

ޖަސްޓިންއާއި ބްލޭކްގެ ކޯޅުން ހޫނުވެ ކޯޓު ހަނގުރާމައަކަށް ބަދަލުވެފައިވާއިރު ދެ ތަރިން ވެސް ތިބީ ދޫ ދޭ ކަހަލަ ގޮތަކަށް ނޫން ކަމަށް ހަބަރުތައް ބުނެ އެވެ.