މަޝްހޫރު ސްޓްރީމިން ޕްލެޓްފޯމް ނެޓްފްލިކްސްގެ އަގުތައް އަނެއްކާވެސް ބޮޑު ކުރަން އެ ކުންފުނީގެ މެނޭޖްމަންޓުން ނިންމައި އެކަން އިއުލާން ކޮށްފި އެވެ.

ނެޓްފްލިކްސްއިން މައުލޫމާތު ދިން ގޮތުގައި އެ ކުންފުނިން ދޭ ހިދުމަތްތަކުގެ އަގުތަކަށް ބަދަލު ގެންނަން ހަމަޖެހިފައިވަނީ ހަމައެކަނި އެމެރިކާގެ އިތުރުން ކެނެޑާގަ އެވެ. އެގޮތުން މިހާތަނަށް އެ ކުންފުނިން ދޭ ޕެކޭޖުތަކުގެ އަގުތައް އެވްރެޖް ގޮތެއްގައި ދެ ޑޮލަރު ބޮޑު ކުރާނެ ކަމަށް ނެޓްފްލިކްސްއިން ބުނެފައިވެ އެވެ.

ނެޓްފްލިކްސްގެ ހިދުމަތްތަކުގެ އަގު ބައެއް ގައުމުތަކުގައި ބޮޑުކުރަން ނިންމާފައި މިވަނީ މިދިޔަ އަހަރުގެ ފަހު ކުއާޓަރުގައި އެ ކުންފުނީގެ ހިދުމަތްތަކަށް ސަބްސްކްރައިބް ކުރި މީހުންގެ އަދަދު ރެކޯޑު މިންވަރަކަށް އިތުރުވެފައި ވަނިކޮށެވެ.

މި އިތުރުވުމަކީ ކޮރެއާގެ މަޝްހޫރު ސީރީޒް "ސްކުއިޑް ގޭމްސް"ގެ ދެވަނަ ސީޒަން ރިލީޒް ކުރުމުން އިތުރުވި އިތުރުވުމެއް ކަމަށް މާހިރުން ބުނެ އެވެ.

ނެޓްފްލިކްސްގެ އަގުތައް ބޮޑުކުރަން ނިންމުމާއެކު އެމެރިކާއާއި ކެނެޑާގައި އެމޭޒަން ޕްރައިމް ވީޑިއޯ ފަދަ އެހެން ސްޓްރީމިން ޕްލެޓްފޯމްތަކަށް އޮތް ޑިމާންޑް ދަނީ ބޮޑުވަމުންނެވެ.