ލޮސް އެންޖެލަސް އަލިފާނުގެ ހާދިސާތަކުގެ ސަބަބުން ފަސްކުރެވުނު އޮސްކާ ނޮމިނޭޝަންތައް އިއުލާން ކުރުމުގެ ރަސްމިއްޔާތު މިދިޔަ ބުރާސްފަތި ދުވަހު ބާއްވައިފި އެވެ.

އަންނަ މާޗު މަހު ބާއްވަން ހަމަޖެހިފައިވާ 93 ވަނަ އެކަޑަމީ އޮސްކާ އެވޯޑްސްގެ ނޮމިނޭޝަންތައް އިއުލާން ކުރެވުނުއިރު 13 ނޮމިނޭޝަންއާއެކު އެންމެ ކުރީގައި އުޅެނީ ނެޓްފްލިކްސްގެ ސްޕެނިޝް ފިލްމު "އެމީލިއާ ޕެރޭޒް" އެވެ.

ސެލީނާ ގޯމޭޒް ލީޑު ރޯލުން ފެނިގެންދާ އެ ފިލްމު ނޮމިނޭޓްވި ކެޓަގަރީތަކުގެ ތެރޭގައި "ބެސްޓް ޕިކްޗާ"، "ބެސްޓް އެކްޓްރެސް"، "ބެސްޓް ޑިރެކްޓަރު" އަދި "ބެސްޓް އޮރިޖިނަލް ސްކްރީންޕްލޭ" ހިމެނެ އެވެ.

ނެޓްފްލިކްސްއަކީ މުނިފޫހިފިލުވުމުގެ ދާއިރާގައި ނަން މަޝްހޫރު ކުންފުންޏެއް ނަމަވެސް މިހާތަނަށް އެކުންފުނީގެ ފިލްމަކަށް ބެސްޓް ޕިކްޗާ އެވޯޑު ލިބިފައިނުވާއިރު "އެމީލިއާ ޕެރޭޒް"އަކީ އެ ކުންފުންޏަށް އެ އެވޯޑް ލިބެން އޮތް އެންމެ ރަނގަޅު ފުރުސަތެވެ.

މިއުޒިކަލް ފިލްމެއް ކަމަށްވާ "އެމީލިއާ ޕެރޭޒް" ވަނީ މީގެ މަހެއްހާ ދުވަސް ކުރިން އޮތް ގޯލްޑަން ގްލޯބް އެވޯޑްސްގައި ވެސް ވިދާލާފަ އެވެ. އެ އެވޯޑްގައި އެ ފިލްމަށް ޖުމްލަ ހަތަރު އެވޯޑް ލިބުނެވެ.

"އެމީލިއާ ޕެރޭޒް"އަށްފަހު މިފަހަރުގެ އޮސްކާގައި އެންމެ ކާމިޔާބު ފިލްމުތަކަކީ "ދަ ބްރޫޓަލް"އާއި "ވިކެޑް" އެވެ. އެއިން ކޮންމެ ފިލްމަކަށް 10 ނޮމިނޭޝަން ލިބިފައިވެ އެވެ.

އޮސްކާ އެކަޑަމީ އެވޯޑް ބާއްވަން ހަމަޖެހިފައިވަނީ އަންނަ މާޗް މަހުގެ ތިންވަނަ ދުވަހު ލޮސް އެންޖެލަސްގެ ޑޮލްބީ ތިއޭޓަރުގަ އެވެ.