މަގުބޫލު ލަވަކިޔުންތެރިޔާ ޓޭލާ ސްވިފްޓްގެ އީރާސް ޓުއާ ނިމުމަކަށް އައިސްފައިވާއިރު އެ ކޮންސެޓުތަކުން އޭނާއަށް ބޮޑު އާމްދަނީއެއް ލިބިފައިވެ އެވެ.

2023 ން 2024 އަށް ކުރިއަށް ދިޔަ އީރާސް ޓުއާއިން ޓޭލާއަށް ދެ ބިލިއަން ޑޮލަރުގެ ބޮޑު އާމްދަނީއެއް ލިބިފައިވާ ކަމަށް ރިޕޯޓުތައް ބުނެ އެވެ.

އޭގެ ތެރެއިން 197 މިލިއަން ޑޮލަރު ޓޭލާ ހަރަދުކުރީ އޭނާއާއެކު އެ ޓުއާގައި ހަރަކާތްތެރިވި ކްރޫ މެމްބަރުންނަށް ބޯނަސް ދިނުމަށް ކަމަށްވެ އެވެ.

އެގޮތުން އީރާސް ޓުއާގައި ހަރަކާތްތެރިވި ކޮންމެ ޕިކަޕް ޑްރައިވަރަކަށް ވެސް ޓޭލާ 100،000 ޑޮލަރު ހަދިޔާކުރި ކަމަށް ހަބަރުތައް ބުނެ އެވެ. އެއީ ގާތްގަނޑަކަށް 50 ޑްރައިވަރުންނެވެ.

ޓޭލާ އޭނާގެ ކްރޫ މެމްބަރުންނަށް ފައިސާގެ އިނާމު ދޭ ފޮޓޯތަކެއް ވެސް މީގެ މަސްތަކެއް ކުރިން ސޯޝަލް މީޑިއާގައި ދައުރުވެފައިވެ އެވެ.

އެއް އަހަަރަށް ކުރިއަށްދިޔަ އީރާސް ޓުއާ މިދިޔަ ޑިސެމްބަރު މަހުގެ ކުރީކޮޅު ނިންމާލިއިރު ދުނިޔޭގެ އެކި ކަންކޮޅުތަކުގައި 149 ޝޯ ބާއްވާފައިވެ އެވެ.