"ހުރިހާ"އިން ކޮންމެ އަހަރެއްގެ ރަމަޟާން މަހަށް ހާއްސަ ކޮށްގެން ގެނެސްދޭ "ރޯދަ މަލާފަތް"ގެ މިއަހަރުގެ ސީޒަންގައި އަޅުގަނޑުމެން ބަލާލާނީ ދިވެހި ރަހަތައް އެކުލެވޭ ދިވެހިވަންތަ ކެއުންތަކަށެވެ. އެގޮތުން އެންމެ ފުރަތަމަ މިއޮތީ ކަށިކޭލުން ހަދާ ކަންޖެކެވެ.

ބޭނުންވާ ތަކެތި

  • 1 ޖޯޑު ކަށިކެޔޮ (ތުނިކޮށް ކޮށާފައި)
  • 3 މޭޒުމަތީ ސަމުސާ ހަނޑޫ ފުށް
  • 2 ޖޯޑު ފެން
  • ފޮނިތޮށި (5 އިންޗީގެ އެތިކޮޅެއް)
  • 7-8 ކާފުރުތޮޅި
  • 1/2 1 ޖޯޑު ފެން (ކަނދި ކައްކަން)
  • 1/2 ޖޯޑު ހަކުރު
  • 1/2 ޖޯޑު ބޯކިރު
  • 2 މޭޒުމަތީ ސަމުސާ ފިނިފެން

ތައްޔާރު ކުރާނެ ގޮތް

  1. 1/4 ޖޯޑު ފެނަށް ހަނޑޫ ފުށް އެއްކޮށްލުމަށްފަހު އެއްފަރާތް ކުރާށެވެ.
  2. 1/2 1 ޖޯޑު ފެން އުދުމަށްފަހު ބޮކި ޖަހައި ކެކިގަންނަންދެން ކައްކާށެވެ.
  3. އެއަށްފަހު ކަށިކޭލާއި ކާފޫރު ތޮޅި އަދި ފޮނިތޮށި އަޅައި ކަށިކެޔޮ ކޮޅު މަޑު ވަންދެން ކައްކާށެވެ. ގާތްގަނޑަކަށް 30 މިނެޓު ވެދާނެ އެވެ.
  4. ހަކުރާއި އިތުރު ދޮޅު ޖޯޑު ފެން އެއްކޮށް ފެންގަނޑު ކެކުމުން ކުރިން ތައްޔާރުކުރި ހަނޑޫފުށް ފެން ތެއްޔަށް އަޅާލާށެވެ.
  5. އެއަށްފަހު ގަނޑުވިޔަ ނުދީ ފެންގަނޑު ހަލަމުން ހަނޑޫފުށް ރޯފިލުވާށެވެ.
  6. ރަނގަޅަށް ރޯފިލުމުން ބޯކިރުކޮޅު އަޅައި މަޑު ގިނީގައި ދެތިން މިނެޓު ކައްކާލާށެވެ.
  7. އެއަށްފަހު އުނދުން މަތިން ބާލައި ފިނިފެން އެޅުމަށްފަހު ރަނގަޅަށް އެއްކޮށްލާށެވެ.