މަޝްހޫރު ރެޕް އާޓިސްޓް ކާންޔޭ ވެސްޓްއާއި އޭނާގެ އަންހެނުންގެ ކައިވެނީގައި ޖެހުނު މައްސަލަތައް ގޯސްވެ އެންމެ ފަހުން އެ ކައިވެނި ރޫޅިފައިވާ ކަމަށް ހަބަރުތައް ބުނެފި އެވެ.

2022 ވަނަ އަހަރު ކައިވެނިކުރި ކާންޔޭއާއި ބިއަންކާގެ މެދުގައި މައްސަލަޖެހި ދެމީހުން ވަކިން އުޅެމުން އަންނަ ކަމުގެ ރިޕޯޓުތައް އެންމެ ފުރަތަމަ އާއްމުވީ 2023 ވަނަ އަހަރު އެވެ. އެހެން ނަމަވެސް އެކުގައި ދުބާއީއަށް ގޮސް އެ ހަބަރުތައް އޭރު އެމީހުން ދޮގުކުރި އެވެ.

އޭގެ ދެ އަހަރު ފަހުން 2025 ވަނަ އަހަރުގެ ކުރީކޮޅު އަނެއްކާ ވެސް އެ ހަބަރުތައް ފެންމަތިވި އެވެ. މިފަހަރު ކާންޔޭ ވަނީ އޭނާގެ އެންމެ ފަހުގެ އަލްބަމުގައި ހިމެނުނު ލަވައެއް ކަމަށްވާ "ބިއަންކާ"އިން ނުސީދާ ގޮތެއްގައި އެކަން ޔަގީން ކޮށްދީފަ އެވެ.

ބުނެވޭ ގޮތުގައި ކާންޔޭއާއި ބިއަންކާގެ ކައިވެނި ރޫޅެން މެދުވެރިވި މައިގަނޑު އެއް ސަބަބަކީ ބިއަންކާގެ އާއިލާއާއި ރަހުމަތްތެރިންނެވެ. ބިއަންކާގެ އާއިލާއާއި ރަހުމަތްތެރިން ވެސް އެ ގުޅުމަށް ނުރުހޭ ކަމަށް ބުނެވެ އެވެ.

ބިއަންކާގެ ރަހުމަތްތެރިން ފާހަގަކުރާ ގޮތުގައި ކާންޔޭއަކީ އެކުގައި ދިރިއުޅެން އެހާ ފަސޭހަ މީހަކަށް ނުވި ނަމަވެސް ބިއަންކާ ވަނީ އެކަމުގައި ކެތްތެރިކަން އިސްކޮށްފަ އެވެ.

އެހެން ކަމުން ކާންޔޭއާ ވަކިވުމަށް އޭނާގެ ރަހުމަތްތެރިންނާއި އާއިލާ ވެސް ވަރަށް ބޮޑަށް ބާރުއެޅި ކަމަށް ހޮލީވުޑްގެ ހަބަރުތައް ބުނެ އެވެ.

ބިއަންކާއާ ކައިވެނި ކުރުމުގެ ކުރިން ކާންޔޭ ކިމް ކާޑޭޝަންއާ ކައިވެންޏެއް ކުރިއިރު އެ ކައިވެންޏަށް ހަތަރު ކުދިން ވެސް ލިބިފައިވެ އެވެ.