ސަލްމާން ޚާންއަކީ މިވަގުތު ބޮލީވުޑްގައި އެންމެ ފުންނާބު އުސް ފިރިހެން ތަރިންގެ ތެރެއިން ތަރި އެކެވެ. އޭނާއަކީ ބެލުންތެރިންގެ ލޯބިވެސް ހޯދާފައިވާ ފަންނާނެކެވެ.
އެހެން ނަމަވެސް ދާދި ފަހުން ދިން އިންޓަވިއުއެއްގައި ސަލްމާން ވަނީ ބޮލީވުޑްގައި ހަރަކާތްތެރިވާ ފަރާތްތަކުން އޭނާއަށް އެހީތެރި ނުވާ ކަމަށް ބުނެ ވާހަކަ ދައްކާފަ އެވެ.
ސަލްމާން ބުނީ ބޮލީވުޑްގެ ޕްރޮޑިއުސަރުންނާއި އެހެން އެކްޓަރުންގެ ފަރާތުން ވެސް އޭނާގެ ފިލްމުތަކަށް އެކަށީގެންވާ ސަޕޯޓް ނުލިބޭ ކަމަށެވެ.
އެގޮތުން އޭނާއަކީ އަމިއްލައަށް ފުދިގެން އުޅެވޭނެ މީހެއްގެ ގޮތުގައި ދެކެވިފައި އޮންނަ ކަމަށާއި އެހެން ނަމަވެސް އެއީ ހަގީގަތެއް ނޫން ކަމަށް ސަލްމާން ބުންޏެވެ.
"އެމީހުންނަށް ހީވަނީ ކަންނޭނގެ އަހަންނަށް އެހީތެރިކަމެއް ބޭނުމެއް ނުވާނެއޭ. އެކަމަކު ހަމަ ކޮންމެ މީހަކީ ވެސް އެހީތެރިކަން ބޭނުންވާނެ މީހެއް" ސަލްމާން ބުންޏެވެ.
އޭގެ އިތުރުން މި ދާއިރާ އިތުރަށް ކުރިއެރުވުމަށްޓަކައި އެކަކު އަނެކަކަށް އެހީތެރިވާން ޖެހޭ ކަމަށް ބުނެ އޭނާއަށް އެހީތެރިވުމަށް ވެސް ސަލްމާން އެދިފައިވެ އެވެ.
ސަލްމާން މި ބީދައިން ވާހަކަ ދައްކާފައި މިވަނީ މިހާރު ސިނަމާތަކުގައި އަޅުވާފައިވާ އޭނާގެ އެންމެ ފަހުގެ ފިލްމު "ސިކަންދަރު"އަށް ފިނި ތަރުހީބެއް ލިބެމުން ދަނިކޮށެވެ.