އެތައް މަސްތަކެއް ވަންދެން އިނގިރޭސި އަވަށެއްގެ ރައްޔިތުންގެ ދިރިއުޅުން އުނދަގޫކުރި ދޫންޏެއް އެ އަވަށުގެ މީހަކު އެންމެ ފަހުން ހިފައިފި އެވެ.

ލަންޑަންގެ އުތުރުން 30 މޭލު ދުރުގައި އޮންނަ ކުޑަ އަވަށެއް ކަމަށްވާ ފްލޭމްސްޓެޑްގެ ރައްޔިތުންނަށް "ހޯކް" ނަމަކަށް ކިޔާ އެ ދޫނި ވަނީ އެކި ފަހަރުމަތިން އެކި ވަރުގެ ހަމަލާތައް ދީފަ އެވެ.

އެގޮތުން އެކި މީހުންނަށް އެ ދޫނީީގެ 50 އަށްވުރެ ގިނަ ހަމަލާ އަމާޒުވެފައިވާއިރު ބައެއް މީީހުންނަށް ވަނީ ހޮސްޕިޓަލުގައި ފަރުވާ ވެސް ދޭން ޖެހިފަ އެވެ. އެހެންވެ އެ އަވަށުގެ ރައްޔިތުން ބޭރަށް ނުކުމެ އުޅެން ޖެހުނީ ހެލްމެޓްއާ އެކުގަ އެވެ.

މީގެ އިތުރުން ވެސް އެ އަވަށުގެ ބައެއް ގެތަކުން އެ ދޫނި ވައްކަން ކޮށްފައިވާ ކަމުގެ ރިޕޯޓުތަކެއް ވެސް ފުލުހުންނަށް ވަނީ ލިބިފަ އެވެ.

މިފަދަ އުނދަގޫތަކެއް ކުރިމަތިވަމުން އަންނަތާ އެތައް ހަފްތާއެއް ފަހުން އެ ދޫނި ހިފާފައިވަނީ އެ އަވަށުގެ ރަށްވެއްސެއް ކަމަށްވާ ސްޓީވް ހެރިސް އެވެ.

ސްޓީވްގެ ތަޖުރިބާ ހިއްސާ ކުރަމުން ސީއެންއެންގައި ބުނެފައިވަނީ އޭނާ އެއް ދުވަހަކު ދުވަން ނުކުމެ އުޅެނިކޮށް އެ ދޫނި އޭނާ ފަހައިގަތް ކަމަށާއި އެ ހަމަލާއިން ރެކެން ވެގެން ވެސް އޭނާ ގިނަ މަސައްކަތްތަކެއް ކުރި ކަމަށެވެ.

އޭގެ ފަހުން ސްޓީވް ވަނީ ކޮށްޓެއްގައި ދަލެއް ޖަހައިގެން އެ ދޫނި ވައްދައި ހިފާފަ އެވެ. ކަމާބެހޭ އިދާރާތަކުން ވެސް ވަނީ ފަހުން އޭނާއަށް އެހީތެރިކަން ފޯރުކޮށްދީފަ އެވެ.

އެ ދޫނި ހިފުމާއެކު އަވަށުގެ ރައްޔިތުންނަށް ހަމަޖެހުމެއް ލިބިފައިވާ ކަމަށާއި އަރާމުގައި ނިދާލުމުގެ ނަސީބު އަލުން ލިބުނީތީ އަވަށް ވަނީ އުފަލުން "ފޮޅިފައި" ކަމަށް ރިޕޯޓުތައް ބުނެ އެވެ.