މަގާމުން ސަސްޕެންޑުކޮށްފައިވާ މޯލްޑިވް ކޭސްގެ މެނޭޖިން ޑިރެކްޓަރު ޝަޒައިލް ޝިޔާމާ ދެކޮޅަށް އެއްވެސް ހެއްކެއް ނެތުމުން ފުލުހުން އެ މައްސަލަ ފައިލްކޮށްފި އެވެ.

ޝަޒައިލްގެ މައްޗަށް މަނީލޯންޑަރިންގެ ތުހުމަތުކޮށް މައްސަލަ ތަހުގީގުކޮށްދޭން ފުލުސް އޮފީހުގައި އެދުނީ އެންޓި ކޮރަޕްޝަން ކޮމިޝަން (އޭސީސީ) އިންނެވެ.

އެ މައްސަލަ ފައިލް ކުރިކަން ފުލުހުން ވަނީ ކަށަވަރުކޮށްދީފަ އެވެ.

އޭސީސީއަށް ޝަޒައިލްގެ މައްސަލަ ފޮނުވީ ރައީސް އޮފީހުންނެވެ.

އޭސީސީން ބަލަމުން ދަނީ ޝަޒައިލަށް ތުހުމަތު ކުރެވޭ ރިޝްވަތުގެ މައްސަލައެކެވެ. މަނީލޯންޑަރިންގެ ތުހުމަތު ކުރެވުނީ އެ މައްސަލައިގެ ތެރެއިން ފެނުނު ކަންތައްތަކެއް ސަބަބުން ކަމަށް އެ ކޮމިޝަނުން ވަނީ ބުނެފަ އެވެ.

ޝަޒައިލް މީގެކުރިން ވިދާޅުވެފައި ވަނީ މަނީލޯންޑަރިންގެ ތުހުމަތު އޭނާގެ ބޮލުގައި އެޅުވީ ރައީސް އޮފީހުން ފޮނުވި މައްސަލާގައި އެއްވެސް ހެއްކެއް ނެތުމުން، އޭނާގެ ބޮލުގައި ތާކުންތާކު ނުޖެހޭ ތުހުމަތެއް އެޅުވީ ކަމަށެވެ.