އަންނަ އަހަރު ބާއްވާ ކައުންސިލް އިންތިހާބާ ދިމާކޮށް ރަށްރަށުގެ ސިއްހީ ހިދުމަތްދޭ ތަންތަނަށް ވެސް ޕޮލިޓިކަލް ޑިރެކްޓަރުން އައްޔަންކުރުމުގެ މަސައްކަތް ފަށައިފި އެވެ.

ސިއްހީ މަރުކަޒުތަކަށް ޕޮލިޓިކަލް ޑިރެކްޓަރުން އައްޔަންކުރުމުގެ މަސައްކަތުގެ ތެރެއިން ހދ. ނޭކުރެންދޫ ސިއްހީ މަރުކަޒަށް ރައީސް މުހައްމަދު މުއިއްޒު ވަނީ މި މަހުގެ 28 ވަނަ ދުވަހު ޕޮލިޓިކަލް ޑިރެކްޓަރެއް އައްޔަންކުރައްވާފަ އެވެ.

އެ މަގާމަށް އައްޔަންކުރީ ނޭކުރެންދޫ ކައުންސިލަރު ކަމުން ދާދިފަހުން އިސްތިއުފާދެއްވި މުހައްމަދު ޒާހިރެވެ.

ޕޮލިޓިކަލް ޑިރެކްޓަރަކަށް މުސާރަ އާއި އިނާޔަތްތައް ހިމެނޭހެން މަހަކު 20,500ރ. ލިބޭނެ އެވެ. އެއީ އަހަރެއްގެ މައްޗަށް 246،000ރ. އެވެ.

ކައުންސިލް އިންތިހާބު ކާމިޔާބުކުރުމަށްޓަކައި ރަށްރަށުން ގިނަ އަދަދެއްގެ ވަޒީފާތައް ދިނުމަށް ސަރުކާރުން އަންނަނީ ތައްޔާރުވަމުންނެވެ. އެގޮތުން ފެނަކަ ފަދަ ކުންފުނިތަކަށް ވެސް ރަށްރަށުން ގިނަ އަދަދެއްގެ މުވައްޒަފުން ނެގުމަށް ނިންމާފައިވެ އެވެ.

މިވެރިކަމުގައި ބޭއްވި ކައުންސިލްތަކުގެ ބައި އިލެކްޝަންތައް ކާމިޔާބު ކުރުމަށް ވެސް ރަށްރަށުން ގިނަ ބަޔަކަށް ވަޒީފާ ދިނެވެ.