މިިދިޔަ އަހަރު ޒަކާތު ފަންޑު މެދުވެރިކޮށް 567 މީހުންގެ ބޭސްފަރުވާއަށް އެހީތެރިކަން ފޯރުކޮށްދީފައިވާ ކަމަށް އިސްލާމިކް މިނިސްޓްރީން ބުނެފި އެވެ.

އެ މިނިސްޓްރީއިން އާންމުކުރި އަހަރީ ރިޕޯޓުން ދައްކާގޮތުގައި ޒަކާތު ފަންޑުން ބޭސްފަރުވާ ކުރުމަށްޓަކައި ވޭތުވެދިޔަ އަހަރު އެ ފަންޑުން 6.34 މިލިއަން ރުފިޔާ ހަރަދުކޮށްފައިވެ އެވެ. އެންމެ ގިނައިން ޒަކާތް ފަންޑުން ފައިސާ ދޫކޮށްފައިވަނީ ކެންސަރު ބަލި ހުންނަ މީހުންނަށެވެ. އެގޮތުން 144 މީހަކަށް އެ ފައިސާ ވަނީ ދޫކޮށްފަ އެވެ.

ދެން އެންމެ ގިނައިން ފައިސާ ދޫކޮށްފައިވަނީ ލޮލުގެ ބައްޔަށް ފަރުވާ ހޯދުމަށް ކަމަށްވާ އިރު، ލޮލުގެ ބައްޔަށް ފަރުވާ ހޯދުމަށް 58 ފަރާތަކަށް ޒަކާތުން ފަންޑުން އެހީތެރިކަން ފޯރުކޮށްދީފައިވެ އެވެ. އަދި ހިތުގެ ބަލި ހުންނަ 26 މީހަކަށް ވެސް ވަނީ އެހީތެރިކަން ފޯރުކޮށްދީފަ އެވެ.

މީގެ އިތުރުން ކިޑްނީ ބައްޔަށް ފަރުވާ ހޯދަމުން އަންނަ 24 ފަރާތަކަށް އެހީތެރިކަން ފޯރުކޮށްދީފައިވާ އިރު، އޯޓިޒަމަށް ފަރުވާ ދިނުމަށްޓަކައި 14 ފަރާތަކަށް އެހީތެރިކަން ފޯރުކޮށްދީފައިވާ ކަމަށް އިސްލާމިކް މިނިސްޓްރީގެ އަހަރީ ރިޕޯޓުން ދައްކަ އެވެ.

ހޮސްޕިޓަލްގެ ބިލްތައް ދެއްކުމަށާއި ޓްރާންސްޕްލާންޓް ހެދުމަށް ހަތް ފަރާތަކަށް ވެސް ޒަކާތު ފަންޑުން ވަނީ އެހީތެރިކަން ފޯރުކޮށްދީފަ އެވެ.

ބޭސްފަރުވާއާ ގުޅުން ހުރިކަންކަން ފިޔަވައި ދެން ޒަކާތުން ފަންޑުން އެހީތެރިކަން ފޯރުކޮށް ދީފައިވަނީ ހާލުގައި ޖެހިފައިވާ ފަރާތްތަކަށާއި، ތައުލީމް ހާސިލްކުރަމުންދާ ފަރާތަކަށެވެ.

ޒަކާތު ފަންޑުގެ ދަށުން ވަނީ ފާއިތުވެދިޔަ އަހަރުގައި ފުލް ސްކޮލަޝިޕް ލިބިގެން ކިޔަވަމުންދާ 13 ދަރިވަރަކަށް ޖުމްލަ 677،166.10 ރުފިޔާ ޚަރަދުކޮށްފަ އެވެ.

ދެހާސް ވިހިވަނަ އަހަރު ނިމުނުއިރު ޒަކާތު ފަންޑުގައި ބާކީހުރީ 129.9 މިލިއަން ރުފިޔާ އެވެ.

ކޮވިޑް-19 އާއި ގުޅިގެން، ޒަކާތު ފަންޑުގެ ދަށުން ބޭސްފަރުވާއަށް އެދުނު މީހުންގެ އަދަދު މަދުކަން ފާހަގަކޮށް، އިސްލާމިކް މިނިސްޓްރީން ބުނީ އެހެން އަހަރުތަކާއި އަޅާ ބަލާއިރު، ބޭސްފަރުވާއަށް ކޮށްފައިވާ ހަރަދު މިއަހަރު މަދުވެފައިވާ ކަމަށެވެ.