ރައީސް މުހައްމަދު މުއިއްޒުގެ ސަރުކާރުން ރާއްޖޭގެ މީޑިއާތަށް ކޮންޓްރޯލް ކޮށް މުށުތެރެއަށް ލުމަށް ހަދާފައި އޮތް ކޮންޓްރޯލް ކޮމިޝަނުގެ ޣައިރު ދުސްތޫރީ އަދި ޣައިރު ގާނޫނީ އެންގުމަށް ތަބާވާން ނުޖެހޭނޭ ކަމަށް އިދިކޮޅު މައި ޕާޓީ އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.

އަދަދު ނޫހުގެ ފޭސްބުކް ޕޭޖާއި އެކްސް އެކައުންޓުގައި ޝާއިއުކުރި "ސިޔާސީ ކާޓޫން" ގެ ވޮލިއުމް 22 އެއްވެސް މީހަކު ދައުރު ނުކުރަން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން އެންގި އެންގުމާ ގުޅިގެން އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ އެ އެންގުމަކީ ގާނޫނުއަސާސީއާ ހިލާފު ކަމެއް ކަމަށެވެ.

އަދަދު ނޫހުން ޝާއިރުކުރި ސިޔާސީ ކާޓޫނު ކޮންޓެންތާއި ގުޅޭ ގޮތުން މީޑިއާ ކޮމިޝަނުން ނެރުނު އިއުލާނެއްގައި ބުނީ އެ ނޫހުން މިދިޔަ ބުރާސްފަތި ދުވަހު ގެނެސްދިން ކާޓޫނަކީ ކޮމިޝަނުން ބަލަމުންދާ މައްސަލައަކާ ގުޅިގެން ނެގުމަށް އަންގާފައިވާ ކާޓޫނަކަށްވާތީ، އެ ކާޓޫނު އެއްވެސް މީހަކު ދައުރު ނުކުރުމަށް އަންގާ ކަމަށެވެ.

އިންޓަނެޓުގައި ޝާއިއު ކުރާ ކޮންޓެންޓަށް އަމުރު ފޯރުވުމުގެ ބާރު ކޮމިޝަނަށް ނުލިބޭނެ ކަމަށް މީގެ ކުރިން ސަރުކާރުން ދިޔައީ ބުނަމުންނެވެ. އެކަމަކު، ނޫސްވެރިންގެ ޖަމިއްޔާ އާއި ނޫސްވެރިން އެއިރު ވެސް ބުނަމުންދިޔައީ ގާނޫނު ފަރުމާކޮށްފައި އޮތް ގޮތުން އިންޓަނެޓުގައި ޝާއިއު ކުރާ ކޮންޓެންޓަށް ވެސް ކޮމިޝަނަށް ބާރު ފޯރުވޭނެ ކަމަށެވެ.

އެކްސްގައި ކުރެއްވި ޕޯސްޓުގައި ފައްޔާޒު ވިދާޅުވީ ސަރުކާރުން އެކަމުގައި ހަދާފައިވަނީ ދޮގުކަން މިއަދު އެންގި އެންގުމުން ސާފުވާ ކަމަށެވެ. އަދި ހިޔާލު ފާޅުކުރުމާއި ނޫސްވެރިކަމުގެ މިނިވަންކަން ފޭރިގަންނަމުން ދަނީ ނުރައްކާތެރި ރޭޓެއްގައި ކަމަށް ވެސް ކުރީގެ އިކޮނޮމިކް މިނިސްޓަރުކަން ކުރެއްވި ފައްޔާޒު ވިދާޅުވި އެވެ.

"ހުރިހާ ހައްގެ ހަނިކުރަމުން ހަނިކުރަމުން ގޮސް މިއަދު އެ ފަށަނީ ހައްގުތައް އެއްކޮށް ނިގުޅައިގަތުމުގެ މަރުހަލާ. އަސާސީ އެއްވެސް ހައްގެއް ހަނިކުރާ ކޮންމެ ގާނޫނެއް އެއީ ބާތިލު ގާނޫނެއް. ކޮންޓްރޯލް ކޮމިޝަނުގެ ޣައިރު ދުސްތޫރީ އަދި ޣައިރު ގާނޫނީ އެންގުމަށް ތަބާވާން ނުޖެހޭ،" ފައްޔާޒު ލިޔުއްވި އެވެ.

ކޮންޓްރޯލް ގާނޫނަކީ ހުރިހާ ރައްޔިތުން ކޮންޓްރޯލް ކުރުމަށް ފާސްކޮށް އަމަލުކުރަމުންދާ ގާނޫނެއްކަން މިއަދު ހާމަވެފައިވާ ކަމަށާއި ހުރިހާ ރައްޔިތުންނަށް އާންމުވެގެންވާ އެންގުމެއް އެންގުމުގެ ބާރު އެ ކޮމިޝަނަށް ނޯންނާނެ ކަމަށް ވެސް އޭނާ ވިދާޅުވި އެވެ.

"ދައުރުގެ ބާކީ އޮތް ބައިގައި ކޮންމެ ދިވެއްސަކު ދައްކާ ވާހަކަ އާއި، ކުރާ ކަންކަމާއި، ލިޔާ ލިޔުންތަކާއި، ކުރަހާ ކުރެހުންތަކާއި، އަޅާ ކޮންމެ ފިޔަވަޅެއް ކޮންޓްރޯލް ކުރެވޭނެ ކަމަށް ދެކިގެން ނުވާނެ. މި އިއުލާނަކީ ގާނޫނުއަސާސީއާ ކަނޑައެޅިގެން ހިލާފު އިއުލާނެއް."

ކާޓޫނުގެ މައްސަލަ ބަލަމުންދާކަން ކޮމިޝަނުން އަދަދުއަށް އެންގީ ބުރާސްފަތި ދުވަހުގަ އެވެ. ކޮމިޝަނުން އަދަދު ނޫހަށް އެންގީ އެ މައްސަލާގައި ފަސް ދުވަހުގެ ތެރޭގައި ޖަވާބުދާރީވުމަށެވެ. އެ މައްސަލައާ ގުޅިގެން އަދަދު ނޫހުން ވަނީ އެ ކޮމިޝަނަށް ރައްދުގައި ސިޓީއެއް ފޮނުވައިފަ އެވެ.

އެގޮތުން އެ ކޮންޓެންޓު އިސްލާމް ދީނުގެ އަސްލަކާ ހިލާފު ކަމަށް 'ތުހުމަތު ކުރެވި' އެ ގޮތަށް ނިންމި ގާނޫނީ ސަބަބުތައް ސާފުކޮށްދޭން އަދަދު ނޫހުން ވަނީ އެދިފަ އެވެ. އަދި ކޮންޓެންޓު ވަގުތީ ގޮތުން ނިންމުމާ މެދު ވެސް އޭރުން ގޮތެއް ނިންމާނެ ކަމަށް އެ ނޫހުން ވަނީ ކޮންޓްރޯލް ކޮމިޝަނަށް އަންގާފަ އެވެ.