ގިނަ ބައެއްގެ މަގުބޫލުކަން ހޯދާފައިވާ ބޮލީވުޑްގެ މަޝްހޫރު ލަވަކިޔުންތެރިޔާ އަރިޖީތު ސިންހް އެ ދާއިރާގެ ފިލްމުތަކަށް ލަވަކިޔުން ހުއްޓާލިކަން އާއްމުކޮށް އިއުލާން ކޮށްފި އެވެ.

އަރިޖީތުގެ އެކްސް އެކައުންޓް މެދުވެރިކޮށް އޭނާ ހިއްސާކުރި ޕޯސްޓުގައި ބުނެފައިވަނީ ބެލުންތެރިންގެ ފަރާތުން ލިބުނު ލޯތްބަށް ޝުކުރު އަދާކުރާ ކަމަށާއި އެހެން ނަމެވެސް ދެން އިތުރަށް ފިލްމުތަކަށް ލަވަ ކިޔަން ބޭނުންނުވާ ކަމަށެވެ.

ފިލްމުތަކަށް ލަވަކިޔުން ހުއްޓާލި ކަމަށް އަރިޖީތު ބުނި ނަމަވެސް މިއުޒިކް ހެދުން ހުއްޓާނުލާނެ ކަމަށް އޭނާގެ ޕޯސްޓުގައި ފާހަގަ ކޮށްފައިވެ އެވެ.

"ފިލްމުތަކަށް ލަވަކިޔުމުގެ އެއްވެސް މަސައްކަތެއް ދެން ނުނަގާނަން. މި ހިސާބުން މި ނިންމާލީ. މިއީ ވަރަށް އުފާވެރި ތަޖުރިބާއެއް" އޭނާގެ ޓްވީޓްގައިވެ އެވެ.

އުމުރުން 38 އަހަރުގެ އަރިޖީތުއަކީ ބޮލީވުޑްގައި އެންމެ ކާމިޔާބު އެއް ލަވަކިޔުންތެރިޔާއަށް ވާއިރު އޭނާގެ މި ކުއްލި ނިންމުމުގެ ސަބަބެއް ހާމަކޮށްފައެއް ނުވެ އެވެ.

އަރިޖީތު ބެލުންތެރިންގެ މަޝްހޫރުކަން އެންމެ ފުރަތަމަ ހޯދީ 2013 ވަނަ އަހަރު ރިލީޒްކުރި ފިލްމު "އާޝިގީ 2"ގައި ހިމެނޭ ލަވައެއް ކަމަށްވާ "ތުމް ހި ހޯ" އިންނެވެ.

ކުއްލިއަކަށް އަރިޖީތު މި ނިންމުން ނިންމުމުން އޭނާގެ ސަޕޯޓަރުން އަންނަނީ ސޯޝަލް މީޑިއާގައި ހިތާމަ ފާޅުކޮށް އަދިވެސް އޭނާ އެނބުރި އަންނާނެ ކަމަށް އުއްމީދުކުރާ ކަމަށް ބުނަމުންނެވެ.